प्रचण्ड र ओलीले रविलाई सोधे- तपाईंहरूको पार्टीभित्र के भएको हो?

सेतोपाटी संवाददाता

काठमाडौं, असार १६

प्रधानमन्त्री पुष्पकमल दाहाल 'प्रचण्ड' र नेकपा (एमाले) का अध्यक्ष केपी शर्मा ओलीले सत्ता साझेदार दल राष्ट्रिय स्वतन्त्र पार्टी (रास्वपा) भित्र पछिल्ला दिनमा देखा परेका घटनाक्रमबारे चासो राखेका छन्।

सिंहदरबारस्थित प्रधानमन्त्री तथा मन्त्रिपरिषदको कार्यालयमा आइतबार दिउँसो प्रधानमन्त्री दाहाल र अध्यक्ष ओलीबीच छलफल भएको थियो। यो छलफलको अन्तिमतिर उपप्रधान तथा गृहमन्त्री रहेका रास्वपा सभापति रवि लामिछाने पनि सहभागी भएका थिए।

प्रधानमन्त्री दाहाल र अध्यक्ष ओलीले रास्वपा सभापति लामिछानेलाई पार्टीभित्र देखा परेका घटनाक्रमबारे सोधेका थिए।

‘तपाईंहरूको पार्टीभित्र के भएको हो खासमा?,’ प्रधानमन्त्री र अध्यक्ष ओलीले रास्वपा सभापति लामिछानेलाई सोधेका प्रश्न उद्धृत गर्दै स्रोतले भन्यो।

जबाफमा सभापति लामिछानेले खासै ठूलो केही नभएको प्रतिक्रिया दिएका थिए।

‘महामन्त्रीले प्रतिवेदन बुझाउनु भएको हो, खासै केही भएको छैन। केही साथीहरूले महामन्त्रीको प्रतिवेदन बुझ्न हुन्न भनिराख्नु भएको थियो, तर मैले बुझेँ,’ सभापति लामिछानेका भनाइ उद्धृत गर्दै स्रोतले भन्यो, ‘प्रतिवेदन बुझाउने महामन्त्रीका पक्षमा खासै पार्टीभित्र माहौल छैन।’

रास्वपा महामन्त्री डा. मुकुल ढकालले ३९ जिल्लाका नेता तथा कार्यकर्तासँग छलफल गरेर त्यसको प्रतिवेदन सभापति लामिछानेलाई बुझाएका थिए। पार्टीमा बुझाउनुअघि नै सञ्चारमाध्यमहरूमा प्रतिवेदनका कुरा सार्वजनिक गरेकोलगायत विषयलाई लिएर महामन्त्री ढकालमाथि गत शुक्रबार पार्टीको अनुशासन समितिले स्पष्टीकरणसमेत सोधिसकेको छ।

महामन्त्री ढकालले बुझाएको प्रतिवेदनलगायत विषयमाथि छलफल गर्न रास्वपाले केन्द्रीय समिति बैठक पनि बोलाएको छ। महामन्त्री ढकालले सभापति लामिछानेसँग अब बस्ने केन्द्रीय समिति बैठक लाइभ गर्न प्रस्ताव गरेका छन्।

यो पनि:

प्रधानमन्त्री प्रचण्ड र ओलीबीच दुई घन्टा छलफल, के भयो कुराकानी?

केन्द्रीय समिति बैठक लाइभ गर्न महामन्त्री मुकुल ढकालको माग

महामन्त्री डा. मुकुल ढकाललाई रास्वपाले सोध्यो स्पष्टीकरण

रास्वपाले बोलायो केन्द्रीय कमिटी बैठक

महामन्त्री ढकालले बुझाएको प्रतिवेदन गम्भीरतापूर्वक अध्ययन गर्छौं: शिशिर खनाल (भिडिओ)

'आलोचना गर्दैमा पददेखि घोक्र्याइँदैन भन्ने सबुत म छु'

प्रदेश संरचना खारेज गर्नुपर्छः रास्वपा महामन्त्री ढकाल

हाम्रो पार्टी विवेकशील बन्ने बाटोमा छ भन्दा म महामन्त्रीबाट घोक्र्याइन सक्छु: मुकुल ढकाल

रास्वपा महामन्त्रीको प्रतिवेदनः ओली र प्रचण्डसँग भन्दा बालेनसँग मिल्नु ठिक

चीनको 'पिपुल्स कंग्रेस' बाट प्रेरित रास्वपाको प्रदेश परिषद्को प्रस्ताव: महामन्त्री ढकाल

रास्वपाले एक वर्षअघि नै अस्वीकृत गरेको थियो बालेनसँग मिल्ने मुकुल ढकालको प्रस्ताव