नेपाली कांग्रेसको केन्द्रीय कार्यालय सानेपामा नेविसंघले प्रदर्शन गरेको छ।
दुजाङ शेर्पा नेतृत्वमा रहेको नेविसंघ केन्द्रीय कार्यसमितिको म्याद समाप्त भइसकेको भन्दै नेविसंघको एक समूहले खाली कुर्सी राखेर आइतबार दिउँसो प्रदर्शन गरेका हुन्।
नेविसंघ नेता भुवन भट्टले नेविसंघको १२ औं महाधिवेशन सुनिश्चितता माग गर्दै प्रदर्शन गरिएको सेतोपाटीलाई बताए।
‘नेविसंघको अहिलेको कार्यसमितिको म्याद सकिइसकेको छ, त्यसैले खाली कुर्सी राखेर प्रदर्शन गर्दै महाधिवेशन सुनिश्चितता मागेका हौं,’ उनले भने।
उनीहरूले नेविसंघ अध्यक्षको खाली कुर्सी राखेर प्रदर्शन गरेका थिए। नेविसंघ तदर्थ समितिको म्याद कांग्रेसले पटक-पटक थप गर्दै आएको छ। पछिल्लो पटक थप गरेको म्याद असार १५ मा सकिएको उनीहरूले बताएका छन्।
नेविसंघ तदर्थ समितिको म्याद अब थप्न नहुने र महाधिवेशन सुनिश्चित गरिनुपर्ने भट्ट बताउँछन्।
‘नेविसंघको १२ औं महाधिवेशन हुन १२ वर्ष नै लाग्ने हो?’ कांग्रेस सभापति शेरबहादुर देउवालाई लक्षित गर्दै उनले भने, ‘महाधिवेशन कहिले गर्ने हो?’
गत पुसमा कांग्रेसले ६ महिनाभित्र महाधिवेशन गर्न नेविसंघलगायत भ्रातृ संस्थाको म्याद थप गरेको थियो। तर पार्टीले दिएको समयमा नेविसंघले महाधिवेशन गर्न सकेन।
