नेपाली कांग्रेसका नेता शेखर कोइरालाले राजनीतिमा अपराधीकरण बढ्दै गएको उल्लेख गर्दै त्यसलाई रोक्न दलहरूले सोच्नुपर्ने बेला आएको बताएका छन्।
नेपाल मुस्लिम संघ, मोरङको तेस्रो जिल्ला अधिवेशनलाई शनिबार विराटनगरमा सम्बोधन गर्दै नेता कोइरालाले राजनीतिमा अपराधीकरणले जरो गाड्न थालेकाले त्यसलाई रोक्न दलहरूले सोच्नुपर्ने बेला आएको उल्लेख गरेका हुन्।
'राजनीतिमा अपराधीकरण बढ्दै गएको छ। राजनीति गर्नु भनेको पैसा कमाउनु हो र जसरी पनि पैसा कमाउने ध्याउन्नले गर्दा राजनीति बिस्तारै विकृत र अपराधीकरणतर्फ उन्मुख भइरहेको छ,' कोइरालाले भने, 'दलहरूले अपराधमा संलग्न जोसुकै भए पनि कारबाही गर्न पछि हट्न हुँदैन।'
आफ्नो पार्टीका नेता-कार्यकर्ताले जस्तोसुकै अपराध गरे पनि त्यसलाई जोगाउनेतर्फ दलहरू लाग्ने गरेको उनको भनाइ थियो।
भ्रष्टाचारले मुलुकलाई नराम्ररी गाँजेको बताउँदै भ्रष्टाचारको विषय आउँदा जहिले पनि ठूला दलका नेतृत्व तहमा रहेका नेताहरू एक ठाउँ उभिन्ने गरेको नेता कोइरालाले प्रस्ट्याए।
उनले भने, 'ठूलाठूला भ्रष्टाचारका विषय उठ्दा ठूला दलका नेतृत्व तहमा रहेका नेताहरू एकै ठाउँ उभिने गरेकाले पनि भ्रष्टाचार नियन्त्रणमा समस्या देखिएको छ। भ्रष्टाचारलाई ठूला दलका नेताले नै मलजल गरिरहेका छन्।'
भ्रष्टाचारका कारण अन्तर्राष्ट्रियस्तरमा नेपालको छवि धमिलिँदै गएको उनको भनाइ थियो।
नेता कोइरालाले भ्रष्टाचारका काण्डहरू बाहिर आउने तर केही समयपछि यसै सेलाएर जाने गरेकाले भ्रष्टाचार नियन्त्रणमा नेपालको भूमिकाप्रति अन्तर्राष्ट्रियस्तरमा प्रश्न उठ्ने गरेको बताए। भ्रष्टाचार नियन्त्रण गरेर सुशासन कायम नगरेसम्म मुलुकको आर्थिक विकास हुन नसक्ने उनले बताए।
उनले संघ र प्रदेशमा गरी विगत डेढ वर्षमा २३ पटक सरकार फेरिएको भन्दै स्थिर सरकार नभएकाले पनि जनअपेक्षा अनुसार काम हुन नसकेको उल्लेख गरे।
त्यस्तै सरकार गिराउने र ढाल्ने खेलमा कांग्रेस नभएको दाबी उनले गरे।
'सरकार गिराउने र बिगार्ने खेलमा कांग्रेस लाग्दैन,' उनले भने, 'तर सत्तारूढ दलभित्रै कलहका कारण यो सरकारको भविष्य पनि त्यति लामो छैन। यो सरकार पाकेको आँप जस्तौ हो, कुन बेला झर्छ थाहा छैन।'
२०८४ सालमा हुने आमचुनाव कांग्रेस एक्लै लड्ने पनि उनले बताए। विगतमा गठबन्धन गरेर चुनावमा जाँदा सरकार सञ्चालन क्रममा कांग्रेसले धोका पाइसकेकाले अब कांग्रेस एक्लै चुनावमा जानुपर्नेमा उनले जोड दिए।
नेता कोइरालाले मुस्लिम समुदाय लोकतन्त्रप्रति प्रतिबद्ध रहेकाले उनीहरूको शिक्षा र आर्थिक विकासका लागि राज्य गम्भीर हुनु आवश्यक रहेको पनि बताए।