नेकपा (एमाले) मोरङ जिल्ला कमिटीले विराटनगर महानगरपालिका कमिटीका अध्यक्ष सागर थापालाई पार्टीबाटै निकालेको छ।
विराटनगरस्थित मानगढ खानेपानी उपभोक्ता समितिको निर्वाचनमा आधिकारिक उम्मेदवारविरूद्ध अर्को उम्मेदवार खडा गरेको आरोपमा थापालाई पार्टीको साधारण सदस्यबाटै एमाले जिल्ला कमिटीले निस्कासन गरेको हो।
महानगर अध्यक्ष थापामाथि कारबाही गरेपछि एमाले मोरङमा विवाद देखिएको छ। अध्यक्ष थापासहित तीन जनालाई जिल्ला कमिटीले कारबाही गरेको थियो।
जिल्ला संगठन कमिटी अध्यक्ष बाबुराम कार्कीले शुक्रबार थापासहित महानगर कमिटीका उपसचिव नवराज नेपाल र मानगढ खानेपानीको अध्यक्षको उम्मेदवार बनेका वडा नम्बर ३ का वडा कमिटी अध्यक्ष लालमणि भट्टराईलाई कारबाहीको पत्र थमाएका थिए।
महानगर अध्यक्ष थापा पछिल्लो स्थानीय चुनावमा महानगरको मेयरमा दोस्रो बनेका थिए।
गत जेठ १९ मा भएको मानगढ खानेपानी आयोजनाको निर्वाचनमा एमाले मोरङले रामबहादुर घिमिरेलाई उम्मेदवार बनाएको थियो।
यसैबीच महानगर अध्यक्षसहित तीन जनालाई गरेको कारबाहीको विरोध गर्दै एमाले विराटनगर महानगरका १९ वटै कमिटीका अध्यक्ष, सचिव तथा इन्चार्जहरुले जिल्ला संगठन कमिटी अध्यक्ष कार्कीलाई ज्ञापन पत्र बुझाएका छन्।
‘पार्टीको आधिकारिक निर्णयसमेत नभएको विषयमा कामचलाउ संगठन समितिको अध्यक्ष कार्कीले जिल्ला कमिटीको बैठकमा निर्णय र माइन्यूट नै नभएको विषयमा विधान विपरित कारबाहीको चिठ्ठी दिएको’ भन्दै उनीहरुले आपत्ति जनाएका हन्।
उनीहरुले २४ घण्टाभित्र कारबाही फिर्ता नगरे हुने क्षति जिम्मा पार्टी जिल्ला कमिटी नेतृत्वले लिनु पर्ने बताएका छन्।
मोरङ एमाले अध्यक्ष ऋषिकेश पोखरेल सांसद एवं प्रतिनिधि सभामा सार्वजनिक लेखा समिति सभापति छन्।
उनको अनुपस्थितिमा उपाध्यक्ष कार्कीले जिल्लामा पार्टीको नेतृत्व गर्दै आएका छन्।
गत जेठ १८ को बैठकले उनलाई जिल्ला संगठन कमिटी अध्यक्ष बनाएको थियो।
