पूर्व प्रधानन्यायाधीश केदार प्रसाद गिरिको नर्भिक अस्पतालमा निधन भएको छ। ७८ बर्षीय गिरीलाई केहि साता अघि अस्पताल भर्ना गरिएको थियो। उपचारकै क्रममा उनको निधन भएको पारिवारिक स्रोतले पुष्टि गरेको छ।
दमले च्याप्दै लगेपछी नर्भिकको सिसियु कक्षमा सातादिन पहिले भर्ना गरिएको थियो। छातीमा संक्रमण बढ्दै गएपछी उनको निधन भएको हो।
उनका दुई श्रीमति, १ छोरी र ४ छोरा छन्।
गिरि २०६४ साल असोज १८ देखि ०६६ साल बैशाख २४ गते सम्म प्रधानन्यायाधीश थिए। त्यसअघि उनी सर्वोच्च अदालतकै न्यायाधीश थिए।
राजा ज्ञानेन्द्रले शासन आफ्नो हातमा लिएपछि भ्रष्टाचारमा मुछिएका सार्वजनिक व्यक्तिहरूमाथि छानविन गर्न भन्दै बनाएको शाही आयोग गिरीकै इजलासले खारेज गरेको थियो। ०६१ माघमा ज्ञानेन्द्रले आयोग गठन गरेका थिए। उक्त आयोग विरूद्ध सर्वोच्चमा परेको रिटमाथि न्यायाधीश गिरि, मिनबहादुर रायमाझी लगायतको इजलासले सुनुवाई गरेको थियो।
