गतिशील लोकतान्त्रिक पार्टीले आफ्नो पर्यटनसम्बन्धी नीति ‘नेपाल पर्यटन दृष्टि २०३५’ भैरहवाबाट सार्वजनिक गरेको छ।
बिहीबार आयोजित पत्रकार सम्मेलनमा पार्टीका सदस्य तथा बुद्ध एयरका कार्यकारी अध्यक्ष वीरेन्द्रबहादुर बस्नेतले नीति सार्वजनिक गर्दै आगामी १० वर्षभित्र ५० लाख नेपालीलाई रोजगारी दिने लक्ष्य राखिएको बताए।
बस्नेतका अनुसार यो लक्ष्य हासिल गर्न नेपाल वायुसेवा निगमलाई पुनर्संरचना गरी त्यसलाई पर्यटन विकासको प्रमुख आधार बनाइने छ।
उनले निगमलाई प्रत्येक वर्ष पाँचवटा नयाँ जहाज थप्दै १० वर्षमा कुल जहाज संख्या ५० पुर्याउने योजना प्रस्तुत गरे।
उनका अनुसार निगमले नगद विनियोजन बिना नै लिज फाइनान्स मोडेलबाट १० प्रतिशत लगानीमा वाइडबडी जहाज भित्र्याउन सक्नेछ। उनले २१ अर्ब रुपैयाँको प्रारम्भिक लगानीमा भैरहवाबाट टोरन्टोसम्म उडान सञ्चालन गर्न सकिने योजना प्रस्तुत गरे।
बस्नेतले निगमका लागि एयरबस ए३५०–१००० मोडेलका ३७९ सिट क्षमताका जहाज उपयुक्त हुने उल्लेख गर्दै, भैरहवाबाट वाइडबडी उडान सम्भव रहेको उदाहरणका रूपमा कतार एयरलाइन्सको उडानलाई उद्धृत गरे।
गतिशील लोकतान्त्रिक पार्टीले नेपालको पर्यटन क्षेत्रको पुनरुत्थानका लागि वायुसेवा निगमको सुदृढीकरणलाई पहिलो प्राथमिकता दिने बताएको छ।
नीति अनुसार निगमको जहाज संख्या बढ्दै जाँदा वार्षिक पाँच लाख पर्यटक थपिने अनुमान गरिएको छ।
पार्टीको योजनामा गौतमबुद्ध अन्तर्राष्ट्रिय विमानस्थलबाट मात्र सातामा तीन वटा अन्तर्राष्ट्रिय उडान सञ्चालन गर्ने लक्ष्य पनि समावेश गरिएको छ।
-1746009348.jpg)
