विश्वसामु नेपालको पर्यटन प्रवर्द्धन गर्न नेपाल पर्यटन बोर्ड र टिकटकबीच साझेदारी भएको छ।
यस अन्तर्गत (लाइफ टाइम एक्सपेरियन्स नामक) अभियान सुरू गरिएको छ, जसको लक्ष्य नेपालका हिमाल, प्राकृतिक सौन्दर्य, सांस्कृतिक सम्पदा र जीवन्त परम्परालाई टिकटक भिडिओमार्फत् विश्वव्यापी दर्शकसमक्ष पुर्याउनु रहेको छ।
समझदारीपत्र आदानप्रदान कार्यक्रमलाई सम्बोधन गर्दै संस्कृति, पर्यटन तथा नागरिक उड्डयन मन्त्री बद्री प्रसाद पाण्डेले यो सहकार्यलाई नेपालको पर्यटन प्रवर्द्धनको पहलमा महत्वपूर्ण योगदान दिने बताएका छन्।
उनले भने, 'यो केवल एउटा सम्झौतामात्र होइन, यो नेपाललाई संसारसँग जोड्ने पुल हो। टिकटक जस्तो विश्वव्यापी प्लेटफर्ममार्फत् हामीले नेपालको हिमाल, संस्कृति, उत्सव र आतिथ्यलाई करोडौं दर्शकमाझ पुर्याउने अवसर पाएका छौं। यो अभियानले नेपाललाई विश्वकै उत्कृष्ट गन्तव्यको रूपमा स्थापित गर्नेछ।'
मन्त्री पाण्डेले पर्यटनलाई नेपालको समग्र आर्थिक विकासको मेरूदण्डको रूपमा उल्लेख गर्दै यो सहकार्यले ग्रामीण भेगका समुदाय, साना व्यवसायी र स्थानीय गाइडहरूलाई प्रत्यक्ष फाइदा पुर्याउने विश्वास व्यक्त गरेका छन्।
नेपाल पर्यटन बोर्डका प्रमुख कार्यकारी अधिकृत दीपक राज जोशीले महत्वपूर्ण समझदारी भएको उल्लेख गर्दै भने, 'नेपालको सौन्दर्य र आत्माको कथा संसारभर पुर्याउने हाम्रो लामो प्रयासलाई अब टिकटकको विश्वव्यापी पहुँचले थप बल दिनेछ। यो सहकार्यले केवल बाहिरी पर्यटकलाई आकर्षित गर्ने मात्र नभई स्वदेशमा रहेका युवाहरूलाई पनि आफ्नो संस्कृति, पर्व र अनुभवलाई नयाँ ढंगले अभिव्यक्त गर्ने अवसर दिनेछ।'
प्रमुख कार्यकारी अधिकृत जोशीका अनुसार बोर्डले अन्तर्राष्ट्रिय स्तरका भ्रमण सिर्जनाकर्तालाई नेपालमा आमन्त्रित गर्नेछ र उनीहरूलाई हिमाल, ताल, मठ–मन्दिरदेखि ग्रामीण होमस्टेसम्म पुर्याउनेछ। उनीहरूले छोटा भिडिओमार्फत् नेपालको पर्यटकीय गन्तव्यबारे डिजिटल संसारमार्फत् प्रचारप्रसार गर्ने जानकारी प्रमुख कार्यकारी अधिकृत जोशीले दिएका छन्।
त्यसैगरी टिकटकका दक्षिण एसियाका सार्वजनिक नीति प्रमुख फर्दोस मत्ताकिनले टिकटकमार्फत् हरेक दिन करोडौं मानिसहरूले नयाँ गन्तव्य र अनुभव खोजी गर्ने भएकाले नेपालको पर्यटन प्रवर्द्धनमा यस सहकार्यले योगदान पुर्याउने विश्वास व्यक्त गरेका छन्।
उनले भने, 'टिकटकमा हरेक दिन करोडौं मानिस नयाँ गन्तव्य र अनुभव खोज्छन्। नेपालजस्तो हिमाल, अध्यात्म, विविध संस्कृतिले भरिपूर्ण देशलाई छोटा भिडियोमार्फत संसारभर पुर्याउन पाउनु हाम्रो लागि गर्वको कुरा हो। यो सहकार्यले नेपाललाई विश्वका पर्यटकहरूको इच्छासूचीमा थप बलियो गरी स्थापित गर्नेछ।' मत्ताकिनले यस अभियान अन्तर्गत ‘#जीवनभरिकाअनुभव’ सङ्केतशब्दमा विशेष अनुप्रयोगभित्रको मञ्च बनाइने जानकारी गराए।
उनले थपे, 'हिमालयदेखि तराईका नदी, उत्सवदेखि खानपान र सांगीतिक परम्परा सबैलाई छोटा भिडियोमा उतारेर विश्वभर देखाइनेछ।'
साझेदारी अन्तर्गत टिकटकले नेपालमै डिजिटल मञ्चमार्फत नेपालका कथाहरू सुनाउने विषयमा कार्यशाला गर्नेछ। जसमा नेपाली सामग्री सिर्जनाकर्तालाई दर्शक विस्तार, ब्रान्ड सहकार्य र विश्वस्तरीय प्रस्तुतीकरणबारे तालिम दिइनेछ।
टिकटकसँग बोर्डले गरेको यो समझदारी अनुसार सन् २०२५ को बाँकी अवधिभर यो अभियान चरणबद्ध रूपमा सञ्चालन हुनेछ। यसबीचमा काठमाडौंमा ‘नेपाल भ्रमण’ प्रदर्शनात्मक कार्यक्रम आयोजना हुनेछ र जसमा अन्तर्राष्ट्रिय सिर्जनाकर्ता, सांस्कृतिक दूत र पर्यटन व्यवसायीहरू सहभागिता रहनेछ। नेपाल पर्यटन बोर्ड र टिकटकको यो समझदारीले नेपाललाई नयाँ पुस्ता, नयाँ बजार र नयाँ विश्व पर्यटन सन्दर्भमा 'डिजिटल पुल' को काम गर्ने विश्वास गरिएको छ।
-1742801159.jpg)
-1746009348.jpg)
