सौर्य एयरलाइन्स नाइनएन—एमई, सिआरजे २०० वायुयान दुर्घटनामा तीन सन्तति गुमाएका प्रकाश खतिवडाले वायुयान दुर्घटना जाँचबुझको प्रतिवेदनमाथि असन्तुष्टि व्यक्त गरेका छन्।
प्रतिनिधि सभाअन्तर्गतको अन्तर्राष्ट्रिय सम्बन्ध र पर्यटन समितिको बैठकमा बिहीबार प्रतिवेदनमाथि छलफल भएको हो।
छलफलमा नेपालको १०९ वटा विमान दुर्घटनाको इतिहासमा सौर्य जहाजको दुर्घटना छुट्टै खालको भएको बताए।
उनले ह्युमन फ्याक्टर कारण दुर्घटना भएको निष्कर्ष देखाइएकोमा सहमति जनाए।
सेवा प्रदायक संस्थाको अनुमति दिने व्यक्ति जाँचबुझ समितिका संयोजक रतिशचन्द्रलाल सुमनको आफन्त भएकाले त्यो नखुलाइएको उनको आरोप छ।
सरकारले छानबिनका लागि बनाएको जाँचबुझ आयोग समेत अवैधानिक रहेको उनले बताए।
उनले भन्नुभयो, ‘यो छुट्टै खालको दुर्घटना हो भन्नुभयो। हो, नेपालको १०९ वटा विमान दुर्घटनाको इतिहासमा सौर्य जहाजको दुर्घटना छुट्टै खालको हो। संयोजकज्युले ह्युमन फ्याक्टरले यो भएको भन्नुभयो, मलाई त्यो भनिसकेपछि मैले गरेको अनुसन्धान ठिक छ भन्ने ठाउँमा म पुगेँ।’
उनले सौर्य एयरलाइन्स, एरोड्रोन र नेविगेसनको कुरा प्रतिवेदनमा गरिएको तर क्यानलाई सेवा प्रदायक भनेर उल्लेख नगरिएकोप्रति आपत्ति जनाए।
उनले भने, ‘सेवा प्रदायक संस्थाको कुरा गर्दा तीन कुराहरू गर्नुभयो। सौर्य एयरलाइन्स, एरोड्रोन र नेविगेसनको कुरा गर्नुभयो। तर क्यानलाई सेवा प्रदायक भनेर उल्लेख गर्नुभएन। उहाँलाई समस्या छ, त्यो उल्लेख नगर्नुको पछाडि। क्यानलाई सेवा प्रदायक संस्था उल्लेख नगर्नुकोपछि उहाँलाई समस्या छ। सेवा प्रदायक संस्थाको अनुमति दिने मान्छे उहाँको आफन्त हो। यो फ्लाइट इलिगल हो, प्यासेन्जर इलिगल हुन्, एयरलाइन्स कम्पनीको हर्कत इलिगल छ।’
उक्त उडान र यात्रुहरू र एयरलाइन्स कम्पनीको हर्कत पनि अवैधानिक रहेको उनले बताए।
४ वर्षको नातिलाई किन सौर्य एयरलाइन्सको कर्मचारी बनाइयो? भन्दै उनले प्रश्न गरे।
ऊर्जा मन्त्रालयमा कार्यरत आफ्नी छोरीलाई समेत सौर्य एयरलाइन्सको कर्मचारी बनाएर उडाइएको उनले बताए।
उनले भने, ‘मेरो ४ वर्षको नातिलाई किन सौर्य एयरलाइन्सको स्टाफ बनाइयो? यहाँ हेर्न सक्नुहुन्छ। म देखाउनसक्छु। अधिराज शर्मा, सौर्य एयरलाइन्स स्टाफ। मेरी छोरी उर्जा मन्त्रालयमा कार्यरत थिइन्। तर सौर्य एयरलाइन्सको स्टाफ लेखिएको छ। घटनाको दिनसम्म उर्जा मन्त्रालयमा कार्यरत थिइन्। आर्थिक र व्यापारिक स्वार्थसँग जोडेर मेरो डिग्निटीसँग खेल्ने प्रयास भयो। मेरो छोरीलाई भ्रष्टीकरण गर्ने प्रयास भएको छ। ऊर्जा मन्त्रालयमा कार्यरत थिइन् मेरी छोरी। कसरी सौर्य एयरलाइन्सको स्टाफ भइन्? आयोग पनि इलिगल छ। यो प्रतिवेदन नियोजित छ।’
प्रतिवेदन बनाउँदा अरूसँग अन्तर्वार्ता लिएको उल्लेख गरे पनि तीन सन्तति गुमाएको परिवारसँग कुनै सोधपुछ नगरिएको उनको भनाइ छ। प्रतिवेदन समेत नियोजित रहेको उनको ठहर छ।
पीडितका कुरा सुनियो भने पनि न्याय पाएको अनुभूति हुने उनको भनाइ छ।
उनले भने, ‘सारासँग अन्तर्वार्ता लिएको छ। तर म तीन सन्तान गुमाएको अभिभावकसँग उहाँले सम्पर्क पनि गर्न चाहनुभएन। मेरो पीडा त्यहाँबाट सुरू भएको छ। पीडितलाई पीडितका कुरा सुनियो भने पनि न्याय पाएको अनुभूति हुन्छ, सर। तपाईंहरूले आज राम्रोसँग कुरा सुनिदिनुभयो भने मलाई न्याय चाहिँदैन। मेरो पीडा कम हुन्छ। तर उहाँहरूले मसँग सम्पर्क गर्न चाहनुभएन। मलाई मान्छे ठान्नुभएन। सबभन्दा बढी क्षति व्यहोरेको मान्छे हुँ।’
उनले न्यायिक जाँच आयोग बनाएर अनुसन्धान गर्न माग गरे। न्याय र क्षतिपूर्तिको सुनिश्चित गर्न पनि जाँच आयोगको आवश्यक रहेको उनले बताए।
तथ्य र प्रमाणले सार्य जहाज दुर्घटना मात्रै नभएको स्पष्ट हुने उनले जिकिर गरे।
२०८१ को साउन ९ गते त्रिभुवन अन्तर्राष्ट्रिय विमानस्थलमा सौर्य एयरलाइन्सको जहाज दुर्घटना भएको थियो। जहाँ १८ जनाको ज्यान गएको थियो। दुर्घटनामा खतिवडाका ज्वाइँ, छोरी र नातिको निधन भएको थियो।—न्युज एजेन्सी नेपाल
-1746009348.jpg)
