एनसेलले खेल र खेलाडीको अभिवृद्धि एवं विकासका लागि विभिन्न खेलहरूमा आबद्धता जनाउँदै आएको बताएको छ।
क्रिकेट, फुटबल, गल्फका साथै राष्ट्रिय तथा अन्तर्राष्ट्रिय खेलहरूमा नेपालको प्रतिनिधित्व गर्ने पारालम्पिक राष्ट्रिय खेलाडीहरूलाई एनसेलले सहयोग गर्दै आएको छ।
आजै मात्र सम्पन्न 'त्रिदेशीय टी–२०आई सिरिज २०२४' बाहेक हालै भएको आइसिसी लिग टु र नेपाल–क्यानडा एकदिवसीय सिरिजमा एनसेल 'कनेक्टेड बाई' साझेदारका रूपमा आबद्ध भएको थियो। 'हाम्रो साथ नेपाली क्रिकेटलाई' भन्ने थिमका साथ एनसेलले यी खेलहरूमा सहयोग पुर्याएको हो।
यसैगरी 'हाम्रो साथ नेपाली फुटबललाई' भन्ने थिममा आधारित भई एनसेलले 'वीरगन्ज गोल्डकप' र 'झापा गोल्डकप'लगायतका फुटबल खेलमा आबद्ध भएको थियो।
विगतमा पनि एनसेलले एन्फासँगको सहकार्यमा 'ए' डिभिजन, यू–१६, वुमन्स नेसनल च्याम्पियनसिप, वुमन्स नेसनल टिमका साथै क्रिकेटअन्तर्गत क्यानको प्राविधिक सहयोगमा 'एनसेल नेपाल प्रिमियर लिग' गरेको थियो।
‘हामी तपाईंकै लागि’ भन्ने थिममा आधारित भई एनसेलले राष्ट्रिय पारालम्पिक समिति (एनपीसी) नेपालसँगको सहकार्यमा नेपाल पारालिम्पिक टोलीलाई साथ र सहयोग प्रदान गर्दै आएको बताएको छ।
चौथो एसियाली पारा खेलकुद २०२२ मा नेपाललाई इतिहासमै पहिलो पदक दिलाउन सफल पारा तेक्वान्दो खेलाडी पलेशा गोवर्धनलाई सम्मान गर्दै एनसेलले १ लाख रूपैयाँ नगद पुरस्कार पनि प्रदान गरेको थियो।
एनसेलले गत भदौमा आफ्नो सेवा सञ्चालनको १८औं वार्षिकोत्सवका अवसरमा व्यावसायिक सामाजिक जिम्मेवारी (सिएसआर) अन्तर्गत एनपिसीसँग सहकार्य घोषणा गरेको थियो।
यसअन्तर्गत कम्पनीले राष्ट्रिय तथा अन्तर्राष्ट्रिय खेलहरूमा नेपालको प्रतिनिधित्व गर्ने पारालम्पिक राष्ट्रिय खेलाडीहरूको समग्र तालिम, विकास तथा प्रशिक्षणमा सहयोग गर्दै आएको छ।
यसैगरी गल्फमा, गल्फ र पर्यटन प्रवर्द्धनसहित आर्थिक र सामाजिक मुद्दामा छलफल तथा अन्तर्क्रिया गराउने उद्देश्यले यही चैत १ गतेदेखि ३ गतेसम्म पोखरामा ‘एनसेल बाह्रखरी गल्फ एन्ड बियोन्ड’ हुँदैछ।
गण्डकी प्रदेश सरकार र पोखरा महानगरपालिका पनि यो कार्यक्रममा सहआयोजकका रूपमा आबद्ध भएका छन्। एनसेलले ‘बाह्रखरी’सँग सहकार्य गर्दै ५ वर्षदेखि हरेक वर्ष यो कार्यक्रम गर्दै आएको छ। यसबाहेक गत मंसिरमा 'एनसेल ओपन गल्फ प्रतियोगिता' पनि आयोजना गरिएको थियो ।
देशको जिम्मेवार कर्पोरेट नागरिकका रूपमा एनसेलले खेल र खेलाडीहरूको अभिवृद्धि एवं विकासमा योगदान गर्दै आएको बताएको छ।
