कोशी प्रदेशका विभिन्न जिल्लाहरूमा पाथिभरा (मक्कुम्लुङ) केबलकार परियोजनाको विरोधमा भइरहेको बन्दले निजी क्षेत्रका प्रतिनिधिमूलक तीन संस्थाले दुर्भाग्यपूर्ण भएको बताएका छन्।
बन्दको कारण स्थानीय जनजीवन प्रभावित बनाएको तथा व्यवसाय, शिक्षा, यातायातलगायतका क्षेत्रमा नकारात्मक असर पारिरहेको भन्दै निजी क्षेत्रले गम्भीर ध्यानाकर्षण गराएको छ।
नेपाल उद्योग वाणिज्य महासंघ, नेपाल उद्योग परिसंघ र नेपाल चेम्बर अफ कमर्सले संयुक्त रूपमा जारी गरेको विज्ञप्तिमा बन्दका कारण आर्थिक गतिविधि अवरुद्ध हुनु दुर्भाग्यपूर्ण भएको उल्लेख गरिएको छ।
संयुक्त विज्ञप्तिमा केबलकार परियोजनाले धार्मिक तथा साहसिक पर्यटन प्रवर्द्धन गर्नाका साथै स्थानीय कृषि, हस्तकला र रोजगारी सिर्जनामा महत्त्वपूर्ण योगदान दिने उल्लेख गर्दै विरोधमा बन्दको सट्टा संवाद गर्न आग्रह गरिएको छ।
हाल भइरहेको बन्दका कारण स्थानीय व्यापार व्यवसाय ठप्प हुन पुगेका छन्। यसले शिक्षा, सार्वजनिक सेवा तथा सर्वसाधारणको दैनिकीमा समेत प्रत्यक्ष असर पारिरहेको छ।
'कुनै पनि विकास योजनासँग असहमति भए वार्ताका माध्यमबाट समाधान खोज्नुपर्छ। आन्दोलनका नाममा आर्थिक गतिविधिमा बाधा पुर्याउनु दीर्घकालीन रूपमा हानिकारक हुन्छ,' संयुक्त विज्ञप्तिमा भनिएको छ।
सरकारले समस्या समाधानका लागि बार्ताको पहल गरिरहेकोमा निजी क्षेत्र सकारात्मक रहेको बताएको छ।
सबै पक्षलाई आपसी संवादमार्फत सहमति खोज्न, हिंसात्मक वा विकास विरोधी गतिविधिहरू नगर्न तथा केबलकार परियोजनालाई निर्वाध रूपमा अघि बढाउन अपिल गरिएको छ।
पाथिभरा क्षेत्र नेपालको प्रमुख धार्मिक तथा पर्यटकीय गन्तव्यमध्ये एक हो। हरेक वर्ष हजारौं तीर्थयात्री तथा पर्यटकहरू यहाँ पुग्ने गर्छन्।
यहाँ अहिले आइएमई समूहले केबलकार निर्माण गर्दैछ। यसले धार्मिक पर्यटन प्रवर्द्धन तथा पर्यटन पूर्वाधार विकासमा ठूलो टेवा पुग्ने आइएमइ समूहले जनएको छ।
आइएमई समूहले यसअघि चन्द्रागिरी, मौलाकालिका, लुम्बिनी क्षेत्रमा केबलकार सञ्चालनमा ल्याएको छ।
