अर्थमन्त्री वर्षमान पुनले सरकार भारतीय अर्थतन्त्रबाट लाभ लिने नीतिमा भएको बताएका छन्।
बुधबार भारतीय उद्योग परिसंघको प्रतिनिधि मण्डलसँगको भेटमा मन्त्री पुनले उक्त कुरा बताएका हुन्।
भारतीय अर्थतन्त्र राम्रो हुँदा नेपालको अर्थतन्त्रमा पनि सकारात्मक प्रभाव पर्ने मन्त्री पुनले बताए।
‘भारतको आर्थिक वृद्धि अघिल्लो वर्ष पनि राम्रो थियो। यो वर्ष पनि राम्रो हुने देखिएको छ,’ मन्त्री पुनले भने, ‘भारतीय अर्थतन्त्र सुधार हुँदा केही हदसम्म नेपालमा पनि त्यसको राम्रो प्रभाव पर्छ।’
मन्त्री पुनले सन् २००८ को आर्थिक मन्दी र कोरोना महामारीको समयमा भारतीय अर्थतन्त्र नबिग्रिएका कारण नेपलाी अर्थतन्त्र मन्दीको प्रभावबाट छिट्टै सुधारिएको बताए।
नेपाल लगानीमैत्री वातावरण बन्दै गएकाले लगानी ल्याउन पनि मन्त्री पुनले अपिल गरेका छन्।
‘विगतमा पनि भारतीय लगानीकर्ताको नेपालमा राम्रो योजना छ,’ मन्त्री पुनले भने, ‘तेस्रो लगानी सम्मेलनको संघारमा यसअघि लगानी गरिरहेकाहरूलाई लगानीको क्षेत्र विस्तार गर्न आग्रह गर्छु। नयाँ लगानीकर्तालाई नेपालमा स्वागत गर्ने नीति रहेको जानकारी गराउन चाहन्छु।’
आफूले यसअघि ऊर्जा मन्त्रालयको समेत नेतृत्व गरेको स्मरण गदै मन्त्री पुनले नेपालमा ऊर्जा र सूचना प्रविधिको क्षेत्रमा लगानी गर्न आग्रह गरे।
लगानी सम्मेलनका लागि भारतीय लगानीकर्ताको राम्रो उपस्थिति हुने विश्वास व्यक्त गरेका मन्त्री पुनले लगानीमैत्री वातावरण बनाउन एक दर्जन कानूनमा संशोधन गर्न लागिएको बताए।
भारतीय प्रतिनिधि मण्डलको नेतृत्व गरेका भारतीय उद्योग परिसंघका प्रेसिडेन्ट देसिग्नेट सञ्जीव पुरीले नेपालमा लगानी ल्याउन भारतीय लगानीकर्ता सकारात्मक रहेको उल्लेख गरे।
भेटमा नेपाल उद्योग वाणिज्य महासंघका अध्यक्ष चन्द्र ढकाल पनि सहभागी थिए।
