सरकारले सेयर लगानीकर्ताबाट हालसम्मकै उच्च पुँजीगत लाभकर प्राप्त गरेको छ।
सरकारले आर्थिक वर्ष २०८१/८२ मा सेयर कारोबारबाट १६ अर्ब ५४ करोड रूपैयाँ पुँजीगत लाभकर पाएको हो। यो हालसम्मकै उच्च हो।
यसअघि आर्थिक वर्ष २०८०/८१ मा भने सरकारले पाँच अर्ब ५१ करोड पुँजीगत लाभकर पाएको थियो।
आर्थिक वर्ष २०८१/८२ मा सेयर कारोबार रकम तीन गुणाले बढेर २१ खर्ब २४ अर्ब रूपैयाँ पुगेको छ। सो अघिको आर्थिक वर्ष २०८०/८१ मा सात खर्ब ३४ अर्ब रूपैयाँको सेयर कारोबार भएको छ।
सेयर लगानीकर्ताहरूले हरेक कारोबारमा नाफा भएमा सरकारलाई कर तिर्नुपर्छ। एक वर्षभन्दा कम अवधिमा भएको नाफामा लगानीकर्ताले ७.५ प्रतिशत र सो अवधिभन्दा धेरै समयबाट भएको नाफामा पाँच प्रतिशत पुँजीगत लाभकर तिर्छन्।
एक वर्षभन्दा कम अवधिमा सेयर बेच्नेहरूबाट मात्रै सरकारले आर्थिक वर्ष २०८१/८२ मा नौ अर्ब ८० करोड लाभकर पाएको हो।
एक वर्षको अवधिमा लगानीकर्ताहरूलाई पनि केही सेयरमा चार गुणासम्म प्रतिफल प्राप्त भएको छ।
-1746009348.jpg)
