केही दिन यता जलविद्युत कम्पनीहरूमा लगानीकर्ताहरू झुम्मिन थालेका छन्।
मंगलबार कुल आठ अर्ब ७४ करोड रूपैयाँको कारोबार हुँदा जलविद्युत कम्पनीहरूको मात्रै पाँच अर्ब ८१ करोड रूपैयाँको कारोबार भएको हो।
यो भनेको कुल कारोबार रकमको आधारमा ६६.४७ प्रतिशत हो।
मंगलबार एकैदिन सबैभन्दा धेरैले कारोबार हुने १० कम्पनीमा आठ वटा कम्पनी यही समूहका रहेका छन्।
यिनको २० कराड रूपैयाँदेखि ९२ करोड रूपैयाँसम्मको सेयर कारोबार भएको छ।
सानिमा माई, ङादी हाइड्रो, राधी विद्युत, युनिभर्सल पावर लगायतका कम्पनीको उच्च रकमको कारोबार भएको हो। सानिमा माइको मात्रै ९२ करोड रूपैयाँको सेयर कारोबार भएको हो।
अहिले जलविद्युत कम्पनीहरूमा आकर्षण बढ्नुमा तीन कारण रहेको ब्रोकरहरू बताउँछन्।
पहिलो कारण बैंकहरूको ब्याजदर ज्यादै न्यून हुनु हो। यसले जलविद्युत कम्पनीहरूको ब्याज लागत घटाएको छ भने खर्च कम हुँदा नाफा बढ्ने सम्भावना देखिएको छ।
दोस्रो, अन्य क्षेत्रमा भन्दा राम्रो अवस्था देखिदै जानुले पनि लगानी विकल्पमा हाइड्रोपावर कम्पनी पर्न थालेको हो।
'बैंकमा जस्तो खराब कर्जाको समस्या यो क्षेत्रमा देखिएको छैन,' एक ब्रोकरले भने, 'बीमा क्षेत्रमा समेत मन्दीको प्रभाव परिरहँदा निश्चित आम्दानी गरिरहने यो क्षेत्रमा आकर्षण देखिएको हो।'
तेस्रो कारण हो, वर्षा। अहिलेको वर्षाले बाढी र डुबानको समस्या कम हुने तर खोलामा पानीको बहाब बढ्ने भएकोले यस्ता कम्पनीहरूको विद्युत बिक्रीबाट हुने आम्दानीमा सुधारको अपेक्षाले पनि लगानीकर्ताहरू यो क्षेत्रमा झुम्मिएका हुन्।
धेरै अघि उच्च मूल्यमा कारोबार भइरहेका यो क्षेत्रका कम्पनीहरूको मूल्य अहिले न्यून वा कम भएकोले मूल्य बढ्दा लाभ हुन सक्ने अपेक्षा लगानीकर्ताहरूमा देखिएको हो।
अहिले जलविद्युत क्षेत्रका कम्पनीमा पनि एउटाभन्दा धेरै आयोजना सञ्चालनमा वा अन्य आयोजना समेत सञ्चालनको तयारीमा रहेका कम्पनीहरूमा लगानीकर्ता आकर्षित भइरहेको ब्रोकरहरू बताउँछन्।
मंगलबार मात्रै होइन केही दिनदेखि नै यो समूहको कारोबार सबैभन्दा धेरै छ। सोमबार बजारमा कुल सात अर्ब ६३ करोड रूपैयाँको कारोबार हुँदा यो समूहको चार अर्ब ५३ करोड रूपैयाँको कारोबार भएको छ। यो भनेको ५९.३७ प्रतिशत हो।
आइतबार बजारमा नौ अर्ब २४ करोड रूपैयाँको कारोबार भएकोमा यो समूहको पाँच अर्ब ४४ करोड रूपैयाँको कारोबार भएको हो। यो कुल कारोबारको ५८ प्रतिशत हो।
-1746009348.jpg)
