विभिन्न छ बीमा कम्पनीले ३१ करोड ४३ लाख ३८ हजार ८३६ कित्ता हकप्रद शेयर निष्कासनको तयारी गरेका छन्।
नेपाल धितोपत्र बोर्डमा दिइएको निवेदनका आधारमा ती बीमा कम्पनीले हकप्रद शेयर विक्री गर्न लागेका हुन्। ती बीमा कम्पनीले कूल छ अर्ब ८५ करोड ६४ लाख ४१ हजार रुपैयाँ मूल्य बराबरको हकप्रद शेयर विक्रीका लागि आवेदन दिएको बोर्डले जनाएको छ।
आवेदन दिनेमा सूर्या लाइफ इस्योरेन्सको २८ लाख ८७ हजार ५०० कित्ता हकप्रद शेयर २८ करोड ८७ लाख ७५ हजार रुपैयाँ मूल्यमा विक्री गर्न लागिएको हो। सो कम्पनीले दश बराबर चार कित्ताको दरमा हकप्रद शेयर दिन लागेको छ। एनआइसी एशिया क्यापिटल विक्री प्रबन्धक रहेको सूर्या लाइफले आर्थिक वर्ष २०७२/७३ मा पाँच प्रतिशतमात्रै बोनस प्रदान गरेको थियो।
यस्तै, सिद्धार्थ इन्स्योरेन्सले २२ लाख ४४ हजार ९७३ कित्ता हकप्रद शेयर विक्री गर्न लागेको छ। सो कम्पनीले २२ करोड ४४ लाख ९७ हजार रुपैयाँ बराबरको हकप्रद शेयर विक्री गर्न लागेको हो। सो कम्पनीको विक्री प्रबन्धकमा एनएमबी क्यापिटल रहेको छ। दश कित्ता शेयर बराबर ३.५ कित्ता हकप्रद दिन लागेको कम्पनीले जनाएको छ। सो बीमा कम्पनीले आव २०७३/७४ मा २० प्रतिशत बोनस दिन सफल भएको थियो।
यस्तै, गुराँस लाइफ इन्स्योरेन्सले २९ लाख ७० हजार कित्ता हकप्रद शेयर २९ करोड ७० लाख रुपैयाँमा विक्री गर्न लागेको हो। सो कम्पनीको शेयर विक्री प्रबन्धकमा लक्ष्मी क्यापिटल मार्केट रहेको छ। कम्पनीले आव २०७२/७३ मा आठ प्रतिशत बोनस उपलब्ध गराएको थियो। कम्पनीले दुई बराबर एक कित्ता हुने गरी हकप्रद दिन लागेको हो।
यसैगरी एभरेष्ट इन्स्योरेन्स कम्पनीले ७२ लाख ९० हजार कित्ता हकप्रद शेयर ७२ करोड ९० लाख रुपैयाँमा विक्री गर्न लागेको हो। हकप्रद शेयरको विक्री प्रबन्धकमा सिद्धार्थ क्यापिटल रहेको छ। एभरेष्टले आव २०७२/७३ मा २० प्रतिशत बोनस उपलब्ध गराएको थियो।
हकप्रद शेयर विक्री गर्न लागेको अर्को बीमा कम्पनी हो नेशनल लाइफ इन्स्योरेन्स कम्पनी। सो कम्पनीले ९९ लाख ३६ हजार ४७७ कित्ता हकप्रद शेयर ९९ करोड ३६ लाख ४७ हजार रुपैयाँमा विक्री गर्न लागेको छ। विक्री प्रबन्धकमा एनआइबिएल क्यापिटल रहेको छ। कम्पनीले आव २०७३/७४ मा २५ प्रतिशत बोनस उपलब्ध गराएको छ।
हकप्रद शेयर विक्रीका लागि बोर्डमा आवेदन दिएको अर्को बीमा कम्पनी हो नेपाल इन्स्योरेन्स। सो कम्पनीले ३० लाख १९ हजार ८८६ कित्ता हकप्रद शेयर चार अर्ब ३२ करोड ३५ लाख ४६ हजार रुपैयाँ मूल्यमा विक्री गर्न लागेको छ। कम्पनीले आव २०७१/७२ मा ९.४७ प्रतिशत बोनस प्रदान गरेको थियो। सो कम्पनीको हकप्रद शेयर विक्री प्रबन्धकमा एनआइबिएल क्यापिटल रहेको छ। नेपाल स्टक एक्स्चेञ्जमा हाल २२ बीमा कम्पनीको शेयर सूचीकृत रहेको छ।
पन्ध्र कम्पनीको मात्रै वित्तीय विवरण सार्वजनिकचालू आवकोे पुस मसान्तसम्म १५ बीमा कम्पनीले मात्रै आफ्नो वित्तीय विवरण सार्वजनिक गरेका छन्। सत्रवटा निर्जीवन बीमा कम्पनीमध्ये १५ वटाले आफ्नो दोस्रो त्रैमासिक प्रतिवेदन प्रकाशित गरेका हुन्।
समीक्षा अवधिमा १५ बीमा कम्पनीमध्ये सबैभन्दा बढी नाफा कमाउनेमा राष्ट्रिय बीमा कम्पनी रहेको छ। सो अवधिमा कम्पनीले ३७ करोड २५ लाख रुपैयाँ नाफा कमाएको छ। सो अवधिमा शिखर इन्स्योरेन्सले १९ करोड ६६ लाख रुपैयाँ नाफा कमाएको छ। उक्त अवधिसम्म ८६ करोड ५९ लाख रुपैयाँ खुद बीमा शुल्क आर्जन गरेको कम्पनीले ३५ करोड ८४ लाख रुपैयाँ बराबरको बीमा दाबी भुक्तानी गरेको छ। सबैभन्दा कम खुद नाफा कमाउने बीमा कम्पनीमा एभरेष्ट रहेको छ। एभरेष्टले पुस मसान्तसम्ममा दुई करोड ३७ लाख रुपैयाँ नाफा गर्न सकेको छ ।
रासस
