अर्थमन्त्री विष्णु पौडेलले मुलुकको अर्थतन्त्रमा यातायात (मोबिलिटी) क्षेत्रको योगदान निकै महत्वपूर्ण रहेको बताएका छन्।
नाइमा मोबिलिटी एक्स्पोको उद्घाटन कार्यक्रममा बोल्दै उनले यस क्षेत्रको विकासका लागि सरकारले पूर्वाधार निर्माणलाई उच्च प्राथमिकता दिएको दाबी गरे।
अर्थमन्त्री पौडेलले गुणस्तरीय सडक पूर्वाधार निर्माण सरकारको प्रमुख प्राथमिकता रहेको बताए।
उनले देशका महत्वपूर्ण सडक आयोजनाहरू जस्तै एक्सप्रेस-वे, हुलाकी सडक, मध्यपहाडी लोकमार्ग, मदन भण्डारी राजमार्ग र काठमाडौं-निजगढ द्रुतमार्गको निर्माण कार्यलाई सरकारले तीव्रता दिइरहेको बताए।
उनले सहरी क्षेत्रको पूर्वाधारमा समेत सरकारले विशेष ध्यान दिएको र धुलो तथा हिलोमुक्त सडक बनाउने प्रतिबद्धता जनाए।
'सडक पूर्वाधार सरकारको उच्च प्राथमिकतामा छ,' उनले भने।
एक्स्पो उद्घाटन कार्यक्रममा नाइमा अध्यक्ष रितुसिंह वैद्यले प्रदर्शनीस्थलको अभावले समस्या भएको गुनासो गरेपछि अर्थमन्त्री पौडेलले त्यसको सम्बोधन गरेका हुन्।
उनले अन्तर्राष्ट्रियस्तरको प्रदर्शनीस्थल निर्माणका लागि सरकारले बजेट विनियोजन गरिसकेको जानकारी दिए।
'चालु वर्षमा अन्तर्राष्ट्रियस्तरको प्रदर्शनीस्थल बनाउने योजनासहित बजेट राखिएको हो,' उनले भने, 'ढिलोमा ३ वर्षभित्र अत्याधुनिक अन्तर्राष्ट्रियस्तरको प्रदर्शनीस्थल तयार हुनेछ।'
अर्थमन्त्री पौडेलले सरकारले नीतिगत स्थिरतालाई प्राथमिकता दिएको र यो सरकार आएपछि सबै आर्थिक परिसूचकमा सुधार आएको दाबी गरे।
तर, यसैमा सन्तुष्ट नभई अझै धेरै काम गर्न बाँकी रहेको उनको भनाइ थियो। उनले सरकारको नीति स्थिर र अनुमानयोग्य भएकोले लगानीकर्तालाई प्रोत्साहित गर्ने बताए।
नाइमा अध्यक्ष रितुसिंह वैद्यले मोबिलिटी क्षेत्रको योगदानको बारेमा प्रकाश पारेकी थिइन्।
उनले यातायात क्षेत्रले देशको कुल गार्हस्थ उत्पादन (जिडिपी) मा ७.३% र रोजगारीमा ४.७% योगदान गरेको बताएकी थिइन्।
नाइकामा हाल ५० भन्दा बढी ब्रान्ड आबद्ध रहेको र यस प्रदर्शनीमा ३५ नयाँ गाडी सार्वजनिक गरिने पनि उनले जानकारी दिइन्।
नाइका एक गैरनाफामूलक संस्था भएकाले नाफा इनोभेसनमा खर्च गर्ने र मोबिलिटी क्षेत्रको सीप प्रवर्द्धनका लागि फेलोसिप दिने काम गर्ने पनि वैद्यले बताएकी थिइन्।
उनले प्रदर्शनीस्थल राम्रो नभएको र गुणस्तरीय सडक पूर्वाधार आवश्यक रहेकोमा जोड दिएकी थिइन्।
उनको भनाइलाई सम्बोधन गर्दै अर्थमन्त्रीले सडक पूर्वाधार निर्माण र प्रदर्शनीस्थल निर्माणमा सरकारले गरेको कामबारे जानकारी दिएका थिए।
नाइमा मोबिलीटी एक्स्पो संयोजक शिरीष मुरारकाले अहिलेसम्मकै सबैभन्दा ठूलो मोबिलीटी एक्स्पो भएको बताए।
-1746009348.jpg)
