बजारमा गोलभेँडाको मूल्य बढिरहेको छ।
एक सातादेखि गोलभेँडाको मूल्य बढिरहेको कालीमाटी फलफूल तथा तरकारी बजारका व्यवसायी ज्ञानेन्द्र श्रेष्ठले जानकारी दिए।
'एक सातामा गोलभेँडाको मूल्य धेरै बढिसक्यो,' उनले भने।
उनका अनुसार एक साताअघि गोलभेँडा प्रतिक्रेट एक हजारदेखि १२ सय रूपैयाँसम्म थियो। अहिले १६ सयदेखि १७ सयसम्म पुगेको छ।
त्यस्तै, टनेल गोलभेँडाको मूल्य भने प्रतिक्रेट १९ सयदेखि दुई हजारसम्म पुगेको छ।
माग अनुसारको गोलभेँडाको उत्पादन नभएकाले मूल्य बढेको उनको भनाइ छ।
अहिले चितवन, सर्लाही, लालबन्दी लगायतका क्षेत्रमा गोलभेँडाको उत्पादन सकिएको छ।
हाल काठमाडौंमा पाँचखाल र भारतीय गोलभेँडा आइरहेको उनले जानकारी दिए।
भारतबाट गोलभेँडा नआएको भए गोलभेँडाको मूल्य अझै बढ्ने उनको भनाइ छ।
'स्वदेशी उत्पादन सकियो। भारतको नआएको भए अझै बढ्थ्यो,' उनले भने।
उनका अनुसार बर्खामा गोलभेँडाको उत्पादन हुँदैन। काठमाडौं उपत्यकाको केही क्षेत्रमा टनेलमा गोलभेँडा उत्पादन गरिन्छ। ती क्षेत्रका गोलभेँडा आएपछि मात्रै मूल्य घट्ने उनको भनाइ छ।
कालीमाटी बजारको तथ्यांक अनुसार बजारमा गोलभेँडा ठूलो भारतीय, भारतीय सानो, लोकल सानो, तराइ सानो र टनेल गरी पाँच प्रकारको आउँछ।
ती मध्ये ठूलो गोलभेँडा होटल तथा रेष्टुरेन्टमा सलादमा प्रयोग हुन्छ भने साना गोलभेँडा दैनिक रूपमा खानामा प्रयोग हुन्छ।
बुधबार कालीमाटी बजारमा भारतीय ठूलो गोलभेँडा प्रतिथोक मूल्य ६० देखि ७०, तराई सानो र स्थानीय लोकल सानो गोलभेँडा ७५ देखि ८५ र भारतीय सानो गोलभेँडा ५५ देखि ६५ र टनेल गोलभेँडा ८० देखि ९० रूपैयाँमा कारोबार भइरहेको छ।
एक साताअघि कालीमाटी बजारमा भारतीय ठूलो गोलभेँडा प्रतिथोक मूल्य ६० देखि ७०, सानो गोलभेँडा ३५ देखि ४०, लोकल सानो गोलभेँडा ३५ देखि ४४ र तराइ सानो गोलभेँडा ३५ देखि ५० रूपैयाँमा कारोबार भइरहेको थियो।
