हिउँद लागेसँगै अधिकांश तरकारीको भाउ सस्तिएको छ।
यो तरकारीको मुख्य सिजन हो। बजारमा प्रतिकिलो थोक मूल्य १० रूपैयाँदेखि तरकारीको मूल्य सुरू हुन्छ।
कालीमाटी फलफूल तथा तरकारी बजार विकास समितिको तथ्यांक हेर्ने हो भने काउली, बन्दा, रायोको साग, फर्सी लगायतका तरकारी प्रतिकिलो १० रूपैयाँमा कारोबार भइरहेको छ।
तरकारीको मुख्य सिजनमा केही तरकारी भने महँगो मूल्यमै कारोबार भइरहेको छ। बजारमा राजमा घिउसिमी, तितेकरेला, भिण्डी र घिरौला भने प्रतिकिलो ९० देखि एक सय १० रूपैयाँमा कारोबार भइरहेको छ।
व्यवसायीहरूका अनुसार अहिले यी तरकारीको सिजन होइन। बर्खामा यी तरकारी सस्तो हुने गर्छ। अहिले भिण्डी, करेला लगायतका तरकारी भारतबाट आयात हुने गरेको छ।
