रूस–युक्रेन द्वन्द्वबाट प्रभावित अधिकांश नेपाली सुरक्षित स्थानमा पुगेका पुगेका छन्।
रुस–युक्रेन द्वन्द्व प्रभावित नेपालीको सहयोग एवं उद्दार उच्चस्तरीय समिति को बैठकलाई बिहीबार साँझ सम्बोधन गर्दै जर्मनीका लागि नेपाली राजदूत रामकाजी खड्काले हालसम्म युक्रेनबाट नेपालीहरू सुरक्षित स्थानको खोजी गर्दै पोल्याण्ड, स्लोभाकिया, हंगेरी, रोमानिया र माल्दावालगायतको देशमा पुगेको जानकारी दिए।
समितिका अनुसार हालसम्म ४ सय ३ जना पोल्याण्ड, ७१ जना स्लोभाकिया, २७ जना रोमानिया, ६ जना हंगेरी र ४ माल्दावा पुगेका हुन्।
हालसम्म ५ सय ११ जना नेपालीहरु सुरक्षित गन्तन्यमा पुगेका छन्। उद्धार गरिएका मध्ये ४ जना नेपालीमा मानसिक स्वास्थ्य समस्या देखिएको छ।
युक्रेनबाट निस्केका मध्ये ४० जना नेपालीले यात्रा अनुमति पत्र (ट्राभल्स डकुमेन्ट) लिएको जर्मनस्थित नेपाली दूतावासले जनाएको छ ।
बैठकलाई सम्बोधन गर्दै उद्दार समितिका संयोजक तथा एनआरएनएका उपाध्यक्ष बद्री केसीले युक्रेनमा करिब ४० जनाको परिवार आफ्नो व्यवसायसहित स्थायी बसोबास गर्दै आएकाले पारिवारिक र व्यवहारिक कारणले युक्रेन छोड्न नसकेको जानकारी दिए।
उनले अप्ठ्यारोमा परेका नेपालीलाई आर्थिक सहयोग समेत गराउने उद्देश्यले संघको पोल्याण्ड राष्ट्रिय समितिलाई आर्थिक संकलनको लागि अनुमति दिएको जानकारी दिए।
उनले एनआरएनएका राष्ट्रिय समितिहरू उद्दार कार्यमा सकृय रूपमा लागिपरेको जानकारी दिँदै एनआरएनए पोल्याण्डको सकृयतामा आर्थिक सहयोग संकलनको तयारी थालिएको जनाए।
रोमानियाका लागि नेपाली काउन्सिलर नवराज पोखरेलले रोमानियामा आयोजित एक सम्मेलनमा सहभागी भएर युद्व प्रभावित नेपालीहरुको समस्याका बारेमा जानकारी दिए।
विश्वभरका एक सय भन्दा बढी देशका प्रतिनिधिहरु सहभागी सो सम्मेलनमा पोखरेलले युक्रेनबाट विस्थापित भएर रोमानिया आएका नेपालीलाई सहयोग गर्न आग्रह गरेका थिए।
बैठकमा स्वास्थ्य समितिका संयोजक डा. बोध सुवेदीले युक्रेन तर्फबाट अन्य देशमा आउने नेपाली संख्या कम हुदै गएको जनाकारी दिए। उनले उद्धारको लागि आग्रह गर्ने नेपालीको संख्या ह्वात्तै कम हुँदै गएको र अवस्था सामान्य बन्दै गएको बताए।
उनले केही नेपाली युद्वको क्रममा हराईरहेको आशंकासमेत रहेको बताए।
गैरआवासीय नेपाली संघ स्लोभाकियाका प्रतिनिधि जयप्रसाद सिवाकोटीले आफ्नै रेष्टुरेन्टमा बनाएको सेल्टरमा नेपालीलगायत अन्य देशमा नागरिकलाई समेत राखेर मानवीय सहयोग गरेको जानकारी दिए। उनले भारतीय, बंगलादेशी र सेनेगलका नागरिकलाई समेत सेल्टर दिएका छन्।
उद्धार समितिले युक्रेनबाट विस्थापित नेपालीको नियमित तथ्यांक संकलन गर्दै आएको रूस-युक्रेन द्वन्द्व प्रभावित नेपालीको सहयोग एवं उद्धार उच्चस्तरीय समितिको प्रेस संयोजक चिरन शर्माले जानकारी दिए।
बैठकमा विगत केही दिनदेखि नेपालीहरुको उद्धारका लागि विभिन्न देशका सीमा क्षेत्रमा खटिएका सुरेन्द्र श्रेष्ठ (हंगेरी) पनव खड्का (पोल्याण्ड) सन्तोष भट्टराई (जर्मनी), चिरनन्जिबी खड्का (चेक रिपब्लिका) लगायतले सिमा क्षेत्रको स्थलगत विवरण प्रस्तुत गरेका थिए।
