भारतका प्रधानमन्त्री नरेन्द्र मोदीले शपथ ग्रहण गरेका छन्।
आइतबार राष्ट्रपति भवनमा एक समारोहबीच राष्ट्रपति द्रौपडी मुर्मूसामु मोदीले प्रधानमन्त्रीको शपथ लिएका हुन्।
शुक्रबार राष्ट्रपति मुर्मूले मोदीलाई प्रधानमन्त्री नियुक्त गरेकी थिइन्।
भारतीय जनता पार्टी (भाजपा) नेतृत्वको गठबन्धन एनडिएका नेताहरूले दलको नेताका रूपमा मोदीलाई नियुक्त गरेको जानकारी गराएपछि मोदी प्रधानमन्त्रीमा नियुक्त भएका थिए।
मोदीको शपथ ग्रहणमा नेपालसहित विभिन्न देशका सरकार प्रमुख तथा राष्ट्र प्रमुख तथा विशिष्ट व्यक्तिहरूको उपस्थिति थियो।
नेपालका प्रधानमन्त्री पुष्पकमल दाहाल 'प्रचण्ड' पनि मोदीको शपथ ग्रहण समारोहमा सहभागी भएका छन्।
मोदीको शपथ ग्रहण समारोहमा बलिउड अभिनेताहरू शाहरूख खान, अक्षय कुमार लगायत र व्यापारी मुकेश अम्बानीको पनि उपस्थिति छ।
भारतीय सञ्चारमाध्यम हिन्दुस्तान टाइम्सका अनुसार भारतले ‘नेबरहुड फर्स्ट पोलिसी’ अर्थात् छिमेकीलाई प्राथमिकताको नीति राखेर छिमेकी मुलुकका प्रमुखलाई शपथ ग्रहण समारोहमा आमन्त्रण गरेको हो।
श्रीलंकाका राष्ट्रपति रनिल विक्रमासिंघे, माल्दिभ्सका राष्ट्रपति मोहमद मुइज्जु, पूर्वीअफ्रिकी मुलुक सेशेल्सका उपराष्ट्रपति अहमद अफिफ र बंगलादेशकी प्रधानमन्त्री शेख हसिना, मौरिससका प्रधानमन्त्री प्रविन्दकुमार जगुनाथ र भुटानका प्रधानमन्त्री तोब्गे पनि शपथ ग्रहण कार्यक्रममा उपस्थित छन्।
मोदीले प्रधानमन्त्रीको शपथ लिएसँगै संघको मन्त्रीका रूपमा राजनाथ सिंह, अमित शाह, नितिन गडकरी, जगत प्रकाश नड्डा, शिवराज सिंह चौहान, निर्मला सितारमण, एस जयशंकर, एचडी कुमार स्वामी, मनोहर लाल खट्टर, पियुष गोयल, धर्मेन्दर प्रधान, जीतनराम माझी, राजिब रञ्जन सिंह लगायतले शपथ ग्रहण गरेका छन्।
त्यस्तै सर्वानन्द सोनोवाल, वीरेन्द्र कुमार, राममोहन नायडू, गिरिराज सिंह, जुएल ओराम, प्रल्हाद जोशी लगायतले पनि शपथ ग्रहण गरेका छन्।
