बेलायतमा पहिलो पटक श्रीमद्भागवत कथा समारोह भव्य रुपमा प्रारम्भ भएको छ।
धर्मदर्शन फाउन्डेशन नेपाल र बेलायत निवासी भक्तजनहरूको सक्रियतामा न्यू साउथवेल्सस्थित विश्व हिन्दू मन्दिरमा मंगलबारदेखि सुरु भएको उक्त समारोहको उद्घाटन बेलायतका लागि नेपाली राजदूत चन्द्र कुमार घिमिरे र पण्डित कुवेर सुवेदीले गरे।
उद्घाटन समारोहलाई सम्बोधन गर्दै राजदूत घिमिरेले नेपालमै पवित्र धार्मिक परम्पराका रूपमा परिचित श्रीमद्भागवत कथा बेलायतमा प्रतिध्वनित हुनु गर्वको विषय भएको बताए।
'श्रीमद्भागवत कथाले नेपाललाई पवित्र भूमि भनेर संसारभर चिनाएको छ, आज यो कथा बेलायतसम्म गुन्जिनु स्वयंमा महत्वपूर्ण अवसर हो। घर–घरमा, जन–जनसम्म यसको वाणी पुग्न सकोस् भन्ने मेरो कामना छ,' उनले भने।
राजदूत घिमिरेले नेपाल सरकार तथा दूतावासको तर्फबाट आयोजकलाई धन्यवाद ज्ञापनसमेत गरे।
पण्डित कुवेर सुवेदीले नेपालको धर्मदर्शन फाउन्डेशनको तर्फबाट बेलायतमा पवित्र भूमि निर्माण गर्ने अवसर पाएकोमा हर्ष व्यक्त गरे। उनले श्रीमद्भागवत कथाको आध्यात्मिक महत्वबारे प्रकाश पार्दै भागवत कथा आध्यात्मिक यात्राको मार्गदर्शन भएको बताए । कथा सप्ताह आगामी १२ अगस्टदेखि १८ अगस्टसम्म दैनिक सञ्चालन हुनेछ।
पहिलो दिनको कथा वाचनमा भक्तजनहरूको उल्लेख्य उपस्थिति थियो। पण्डित चिरञ्जीवी ढकाल र निलहरि घिमिरेले स्वस्तिवाचन गरेका थिए। श्रीकृष्ण जन्माष्टमीको पावन अवसर पारेर आयोजना गरिएको यस कार्यक्रम प्रत्येक दिन साँझ ४ देखि ६:३० बजेसम्म सञ्चालन हुनेछ।
आगामी १६ अगस्टमा श्रीकृष्ण जन्माष्टमी महोत्सव भव्य रूपमा आयोजना गरिने धर्मदर्शन फाउन्डेशनले जनाएको छ।
-1746009348.jpg)
