अस्ट्रेलियामा दुई युवाहरूले सञ्चालन गरेको आइटी कम्पनी आइटी टुगेदर टेक्नोलोजीले एक वर्षमै ‘आउटस्टाण्डिङ न्यू विजनेश अवार्ड’ जित्न सफल भएको छ।
२६ वर्षीय दुई नेपाली युवाहरूले सञ्चालन गरेको सो आइटी कम्पनीले एक वर्षकै अवधिमा ‘आउटस्टाण्डिङ न्यू विजनेश अवार्ड’ जितेपछि अस्ट्रेलियामा धेरैको ध्यान तानिरहेको छ।
अस्ट्रेलियामा ‘आउटस्टाण्डिङ न्यू विजनेश अवार्ड’ लाई विशेष महत्वका साथ हेरिने भएकोले पनि एक वर्षको बीचमै उनीहरूले पाएकोले धेरैले चासो र उत्साहका साथ हेरिरहेका हुन्।
आइटी टुगेदर कम्पनी ओम राउत र प्रदीप दाहालले संयुक्त रूपमा सञ्चालन गर्दै आएका छन्। राउत कम्पनीका निर्देशक हुन् भने दाहाल एसिया प्यासिफिक क्षेत्रका सिइओ हुन्।
कम्पनीले अस्ट्रेलियाका साना तथा मध्यम व्यवसायहरूलाई आइटी सपोर्ट र एजेन्टिक एआई सेवा प्रदान गर्दै आएको छ।
अवार्ड हासिल गरेपछि कम्पनीका निर्देशक राउत र सिइओ दाहालले खुसी व्यक्त गरेका छन्।
‘हामी एआईबाट सञ्चालित छौं, तर मानव समर्थनमा भर पर्छौ,’ निर्देशक राउतले भने, ‘हाम्रोमा विश्वास गर्ने सबै ग्राहकलाई धन्यवाद। अबको भविष्य एजेन्टिक एआई हो, र हामी साना व्यवसायलाई छिटो अगाडि बढ्न सहयोग गरिरहेका छौं।’
सो आइटी कम्पनीमा काम गर्ने धेरैजसो प्राविधिक (टेक्निकल) स्टाफहरू नेपालमै छन्। उनीहरूले नेपालमै बसेर अस्ट्रेलियाका ग्राहकलाई सेवा दिइरहेका छन्।
‘यो अवार्डले देखाउँछ कि नेपाली युवाले पनि अन्तर्राष्ट्रिय स्तरमा उत्कृष्टता देखाउन सक्छन्,’ सिइओ दाहालले भने, ‘नेपालमा बसेर अस्ट्रेलियामा व्यवसाय सफलतापूर्वक चलाउनु भनेको क्षमता र दृष्टिकोणको जीत हो।’
कसरी पाउँछन् यो अवार्ड?
स्थानीय सरकारले प्रदान गर्ने अवार्डका लागि सार्वजनिक रूपमा मनोनयन गर्नुपर्छ र ती मनोनयन भएका कम्पनीहरूलाई सार्वजनिक रूपमा मत हाल्नुपर्छ र विशेषज्ञहरूले कामको मूल्यांकन समेत गर्ने गर्छन्। यसले व्यवसायको विश्वास, नाम र अवसर दुबै बढाउने भएकोले पनि अवार्ड निकै महत्वपूर्ण हुन्छ।
-1746009348.jpg)
