महेश श्रेष्ठ नेतृत्वको गैरआवासीय नेपाली संघ (एनआरएनए) ले अस्ट्रेलियाको राष्ट्रिय समन्वय परिषद् (एनसिसी) अन्तर्गतको अधिवेशन प्रक्रिया विवादास्पद रूपमा अघि बढाइएको भन्दै असन्तुष्टि जनाएको छ।
अस्ट्रेलियाको राष्ट्रिय समन्वय परिषद् (एनसिसी) अन्तर्गतको अधिवेशन प्रक्रिया विवादास्पद रूपमा अघि बढाएको आरोप लगाउँदै विवेक थापाको संयोजकत्वमा ‘सदस्यता वितरण तथा एकता अधिवेशन समिति’ गठन गरेको छ।
पटक–पटक निर्देशन र सुझाव दिँदा पनि एनसिसी अस्ट्रेलियाले संस्थागत प्रक्रियालाई बेवास्ता गर्दै अधिवेशनको तयारी एकपक्षीय रूपमा अघि बढाएको आरोप लगाउँदै त्यसैको प्रतिक्रियामा नयाँ समिति गठन गरिएको विज्ञप्तिमा उल्लेख छ।
विवेक थापाको संयोजकत्वमा गठित समितिले अस्ट्रेलियास्थित विभिन्न संघसंस्था, समुदायका प्रतिनिधिहरू, तथा आम एनआरएन नागरिकहरूसँग व्यापक छलफल गर्दै सदस्यता वितरण, निर्वाचन, र अधिवेशनसम्बन्धी सम्पूर्ण प्रक्रिया अघि बढाउने महेश श्रेष्ठ नेतृत्वको एनआरएनएको भनाइ छ।
महेश श्रेष्ठ नेतृत्वको एनआरएनए महासचिव बी.आर. लामाका अनुसार समग्र गैर-आवासीय नेपाली समुदायको साझा आवाज बन्न सक्ने विश्वासका साथ, अस्ट्रेलियामा समावेशी, सर्वपक्षीय र एकताबद्ध संगठन निर्माणको लागि विवेक थापालाई यो जिम्मेवारी दिइएको हो।
एमआइएस प्रणालीबाट सदस्यता लिन नपाएका तथा छुटेका हजारौं एनआरएनलाई समेटेर एकता महाधिवेशन गराउने जिम्मा थापालाई दिइएको ओसिनिया क्षेत्रीय संयोजक इर्साद अहमदले बताए।
'हामीले सदस्यता लिन नपाएका झन्डै १५ हजारभन्दा बढी नेपालीहरूका लागि चाँडै सदस्यता प्रक्रिया पुनः सुरू गर्दैछौं,' संयोजक अहमदले बताए।
पटक–पटक आग्रह गर्दा पनि वर्तमान कार्यसमितिले सदस्यता समावेशी बनाउने विषयमा कुनै चासो नदेखाई एकपक्षीय निर्णय लाद्न खोजेकाले, विकल्प नहुँदा उच्चस्तरीय समितिको सिफारिसअनुसार यो समिति गठन गरेर आफूलाई जिम्मेवारी दिएको संयोजक थापाले बताए।
यता एनआरएनए अस्ट्रेलियाका महासचिव सन्तोष कुँवरले आफूहरू निकै अगाडि बढिसकेको प्रतिक्रिया दिए।
'चुनावी प्रक्रिया निकै अगाडि बढिसकेको छ। यस विषयमा हामी केही भन्दैनौं, हामी धेरै अगाडि बढिसक्यौं, उहाँहरूको कुरा हामीलाई थाहा भएन,' उनले भने।
एनआरएनए अस्ट्रेलियामा आगामी २६ तारिख नयाँ नेतृत्व चयनका लागि निर्वाचन हुँदैछ।
-1746009348.jpg)
