गैरआवासीय नेपाली (एनआरएनए) साउथ अस्ट्रेलियाले आयोजना गरेको नेपाल महोत्सवका कारण एडिलेडको मुख्य सहर आइतबार नेपालमय भयो।
नेपाली कला संस्कृति रीतिरिवाज तथा नेपालको पर्यटकीयस्थलको प्रवर्धन गर्न महोत्सव आयोजना गरिएको थियो।
त्यस्तै अस्ट्रेलियामा बस्ने नेपालीबीच सद्भाव एकता र भाइचार बढाउने मुख्य उद्देश्य राखेर एनआरएनए अस्ट्रेलियाले गर्ने यो ‘नेपाल महोत्सव’ हरेक दुई वर्षमा आयोजना हुँदै आएको छ।
बिहानदेखि राति अबेरसम्म चलेको महोत्सवमा बाक्लो संख्यामा नेपाली सहभागी भएको आयोजक संस्थाले जनाएको छ।
करिब १५ हजारले अवलोकन गरेको महोत्सवमा मुख्य आकर्षणको नेपाल हाउस थियो।
नेपाल हाउसमा यसपालि नेपालकै झल्को दिने गरी धरहरा, सुन्धारा, बौद्ध स्तुपा, पशुपतिनाथ, पेगोडा शैलीको विशेष रथ राखिएको थियो।
नेपालमा मात्र पाइने एकसिङ्गे गैंडाको प्रतिकात्मक मूर्तिसमेत विशेष आकर्षण बनेको थियो।
महोत्सवमा नेपालकै झल्को मेटाउन पाएको सहभागीहरूले प्रतिक्रिया दिएका थिए।
कार्यक्रमस्थलमा नेपाली मौलिक खाना र जात्रा तथा विभिन्न जात–जातिका कला, संस्कृति र वेशभूषा झल्कने झाँकी प्रदर्शन गरिएको थियो।
कार्यक्रममा नेपालको चर्चित सांगीतिक ब्याण्ड कन्दराले आफ्नो प्रस्तुति दिएको थियो।
त्यसै गरी कलाकारहरू शिव परियार र समीक्षा अधिकारीले आफ्नो प्रस्तुति दिएका थिए।
प्रमुख अतिथि अस्ट्रेलियाका लागि नेपालका राजदूत चित्रलेखा यादव र विशेष अतिथि मन्त्री वेटिसनले संयुक्त रुपमा पानसमा बत्ती बालेर महोत्सवको उद्घाटन गरेका थिए ।
महोत्सवलाई सम्बोधन गर्दै राजदूत यादवले अस्ट्रेलियामा नेपाली समुदायको वृद्धिसँगै नेपाली कला, संस्कृती, भाषा, वेशभूषा, रीतिरिवाजको जगेर्ना र प्रवर्धन गर्न यस्ता महोत्सवले विशेष योगदान पुर्याउने बताइन्।
साउथ अस्ट्रेलियाकी बहुसांस्कृतिक र पर्यटनमन्त्री जोय बेटिसनले नेपालीको यस्ता कार्यक्रमले अस्ट्रेलियामा नेपालीको उपस्थितिलाई अझ बलियो बनाएको बताउँदै यस्ता सामुदायिक कार्यक्रमलाई आगामी दिनमा पनि राज्यले सक्दो साथ र सहयोग पुर्याउने प्रतिबद्धता व्यक्त गरिन्।
कार्यक्रममा साउथ अस्ट्रेलियाको विपक्षी लिवरल पार्टीका नेता भिन्सेन्ट टार्जिया, एनआरएनए अस्ट्रेलिया अध्यक्ष अनील पोखरेल, मुख्य प्रायोजक बुमर्याङ इन्टरनेशनलका निर्देशक आशिष वाग्लेलगायतले सम्बोधन गरेका थिए।
कार्यक्रममा एनआरएनए उपाध्यक्ष तथा साउथ अस्ट्रेलियाका संयोजक संजय पुरीले महोत्सवलाई भब्य र सभ्य रुपमा सम्पन्न गर्न साथ र सहयोग पुर्याउने सबै प्रति धन्यवाद दिए। उनले यहाँको नेपाली समुदाय र साउथ अस्ट्रेलिया राज्य सरकारको साथ अनि सहयोगबाट नै कार्यक्रम सम्पन्न गर्न सकिएको उल्लेख गरे।
यसअघि एडिलेडको पिंकी फ्ल्याटबाट सुरू भएको नेपाल परेड विभिन्न झाँकीहरूसहित एल्डल्स पार्कमा पुगेर सभामा परिणत भएको थियो। गुरुङ, थारू, मगर, तामाङ, नेपाल लगायत नेपाली परम्परागत संस्कृतिको झलक परेडमा देखिएको थियो।
अस्ट्रेलियाका विभिन्न सहरमा आयोजना भइरहेको नेपाल महोत्सव यसअघि डार्बिन, पर्थ र सिड्नीमा सम्पन्न भइसकेको छ। यसैबीच आगामी शनिबार मेलबर्नमा हुने महोत्सवको तयारी तीव्र पारिएको छ।
मेलबर्नको प्रमुख पर्यटकीय स्थल फेडेरेसन स्क्वायर आगामी मार्च १५ मा नेपालमय हुने भएको छ। नेपाल महोत्सव मेलबर्नको सबै तयारी पूरा भएको एनआरएनए अस्ट्रेलियाका उपाध्यक्ष एवं भिक्टोरिया राज्यका संयोजक मणिरत्न सापकोटाले जानकारी दिए।
सापकोटाका अनुसार यस पटकको नेपाल फेष्टिभलमा जानकी मन्दिरको प्रारूप प्रदर्शन गरिने भएको छ। यस्तै मिथिला आर्ट, धान रोपाइँ गर्ने व्यवस्था र विवाह मण्डप निर्माण गरेर दर्शकहरूलाई बेहुला वा बेहुलीको स्वरूपमा फोटो खिच्न पाउने व्यवस्थासमेत मिलाइने भएको छ।
यस्तै महोत्सवमा ८ वटा खानाका स्टल रहने र एउटा नेपाली पेयसहितको छुट्टै स्टल रहने उनले जानकारी दिए। यस्तै, सहयोगी संस्थासहित अन्य ३० वटाजति व्यवसायी स्टल रहने उनले बताए।
नेपाल महोत्सव मेलबर्नमा पहिलो पटक प्रमुख अतिथिको रूपमा भिक्टोरिया राज्यकी प्रिमियर जसिन्टा एलान सहभागी हुने भएकी छन्। यस्तै अस्ट्रेलियाका लागि नेपाली राजदूत चित्रलेखा यादव, संघीय सांसदहरू, विपक्षी दलका नेताहरू तथा सांसदहरू सहभागी हुने पक्का भएको सापकोटाले जानकारी दिए।
‘नेपाल महोत्सव मेलबर्नमा पहिलो पटक राज्यको प्रिमियर नै सहभागी हुँदै गर्दा सबै जना उत्साही भएका छन्,’ उनले भने, ‘नेपाल महोत्सव मेलबर्नमा आउने दर्शकहरूलाई सहज होस् भन्ने अभिप्रायले जिलोंग, बालाराट, बेन्डिगो लगायतका ठाउँबाट आउनका लागि बसको व्यवस्था समेत गरिएको छ।’
