'ओ माइ गड' सन् २०१२ को सर्वाधिक मनपराइएको बलिउड फिल्म हो। अभिनेता अक्षय कुमार, परेश रावल र मिथुन चक्रवतीको मुख्य भूमिका रहेको यो फिल्ममा परेश रावलको चरित्रलाई विशेष मन पराइएको थियो।
तर यो फिल्मको सिक्वलमा परेश रावल देखिएनन्। उनको ठाउँमा पंकज त्रिपाठीले अभिनय गरेका छन्।
११ जुलाईमा फिल्म 'ओ माइ गड २' को टिजर सार्वजनिक भएको छ। सार्वजनिक टिजरमा परेश नदेखिएपछि दर्शकले सामाजिक सञ्जालमार्फत परेशलाई फिल्ममा किन नलिएको भन्दै प्रश्न गरिरहेका छन्।
'ओ माइ गड २' घोषणा हुँदै परेशले भनेका थिए, 'मलाई फिल्मको कहानी मन परेन त्यसैले फिल्म खेलिनँ। मलाई एकै भूमिका निभाउन मजा लाग्दैन।'
अमित राय लिखित तथा निर्देशित फिल्म 'ओ माइ गड २' मा पंकजसँगै अक्षय कुमार र यामी गौतमको मुख्य भूमिका छ। फिल्ममा पंकजलाई आस्तिक र अक्षयलाई भगवान शिवको रूपमा प्रस्तुत गरिएको छ।
यो फिल्म अगस्ट ११ देखि प्रदर्शन हुँदैछ। यहि मितिमा सनी देओल र अमीषा पटेलको फिल्म 'गदर २' पनि प्रदर्शन हुनेछ।
सन् २०१२ मा प्रदर्शन भएको फिल्म 'ओ माइ गड' बक्स अफिसमा हिट भएको थियो। फिल्ममा परेश रावलले भगवानलाई अदालतमा मुद्दा हालेका थिए।
