जेनजी आन्दोलनका कारण गत मंगलबारदेखि ठप्प देशभरका सिनेमा हलहरू भोलि (सोमबार) देखि खुल्दैछन्।
हल खुलेसँगै पछिल्ला रिलिज फिल्महरूको प्रदर्शनलाई नै निरन्तरता दिइँदैछ।
सोमबारदेखि 'रिमै' र 'कोशेढुंगा' सहितका नेपाली फिल्महरू प्रदर्शनमा आउँदैछन्। त्यस्तै, 'गुन्योचोलो', 'मोहर', 'माग्ने राजा', 'जनै हराएको मान्छे' लगायतका नेपाली फिल्महरू पनि हलमा लाग्दैछन्।
यीमध्ये 'रिमै' पछिल्लो रिलिज नेपाली फिल्म हो। भदौ २० गते रिलिज दयाहाङ राई र रिश्मा गुरूङ अभिनीत फिल्मको प्रदर्शन केही दिनमै रोकिन पुगेको थियो। यसका निर्देशक खिलबहादुर गुरूङका अनुसार फिल्म क्षेत्रलाई चलायमान बनाउने उद्धेश्यका साथ 'रिमै' को प्रदर्शनलाई निरन्तरता दिन लागिएको हो। उनले यसअघि फिल्म हेरेका दर्शकहरूबाट राम्रो प्रतिक्रिया पाएकाले सोमबारबाट पनि साथ पाउने विश्वास व्यक्त गरेका छन्।
त्यस्तै, सुरक्षा पन्त अभिनीत 'कोशेढुंगा' दोस्रो सातामा प्रदर्शन भइरहँदा आन्दोलन चर्किएपछि प्रदर्शन रोकिन पुगेको थियो। यसका निर्देशक सरोज पौडेलले सोमबारदेखि फिल्म प्रदर्शनलाई निरन्तरता दिन लागिएको बताए।
उनका अनुसार यो फिल्मले विस्तारै दर्शकको साथ पाइरहेको थियो। उनले भने, 'दर्शकहरू बढिरहनुभएको थियो। दोस्रो हप्तामा राम्रो व्यापार गरिरहेको थियो। प्रतिक्रिया पनि एकदमै राम्रो पाइरहेका थियौं। त्यही समयमा परिस्थिति असहज बनेपछि प्रदर्शन रोकियो। अब सोमबारदेखि प्रदर्शनलाई निरन्तरता दिँदैछौं। दर्शकहरूको साथ पाउने विश्वास छ।'
'द कन्जुरिङ', 'बागी ४', 'परम सुन्दरी' लगायतका विदेश फिल्महरू समेत हलमा लाग्दैछन्।
मल्टिप्लेक्स हलहरूले फिल्मको शो तालिका सार्वजनिक गर्दै बुकिङ खुलाउन समेत सुरू गरेका छन्।
अहिलेको परिस्थितिलाई मध्येनजर गर्दै ६ बजेपछिको शोहरू राखिएका छैनन्।
जेन-जी आन्दोलनका क्रममा केही सिनेमा हलमा समेत क्षति पुगेको छ। सिनेमा हलमा १७ करोड रूपैयाँ बराबरको क्षति भएको चलचित्र संघले जनाएको छ। क्षति पुगेका बाहेकका सबै हलहरू सोमबारदेखि खुल्न लागेका हुन्।
यो पनिः 'बलिदान', 'माइतीघर' र 'हरिबहादुरको जुत्ता' फूलपातीमै आउँछन्?
-1746009348.jpg)
