पूर्वसांसद तथा गायिका कोमल वलीले जेन-जी आन्दोलनको आवरणमा आफ्नो होटलमा आगो लगाइएको भन्दै आपत्ति जनाएकी छन्। उनको दाङ तुलसीपुरमा रहेको होटलमा मंगलबार आगो लगाइएको थियो। त्यहाँस्थित उनको घरमा समेत तोडफोड भएको छ।
घर तोडफोड र होटलमा आगो लगाइएपछि कोमलले सामाजिक सञ्जालमा भावुक स्टाटस लेख्दै आफ्नो पसिना, आँसु र सपना खरानी बनाइएको उल्लेख गरेकी छन्।
उनले आन्दोलनका क्रममा ज्यान गुमाउनेहरूप्रति श्रद्धाञ्जली र घाइतेहरूको शीघ्र स्वास्थ्य लाभको कामना गर्दै निर्दोष नानीबाबुले ज्यान गुमाउँदा आफ्नो छाती चिरिएको बताएकी छन्।
उनले गाउँलाई रोजगारी दिने, स्थानीय उत्पादनलाई बजारमा पुर्याउने र सबैलाई समृद्धिको बाटोमा अघि बढाउने सपना देखेर 'कोमल होटल' सञ्चालन गरेको बताएकी छन्। यो होटल एक वर्षअघि मात्रै खुलेको थियो। कोमलले आफ्नो होटल कुनै पाँचतारे होटलसँग प्रतिस्पर्धा गर्न नभई प्राकृतिक सौन्दर्यका कारण आम जनताको नजरमा परेको बताएकी छन्।
'यो होटल मेरो मात्र नभई गाउँको रगत–पसिनासँग जोडिएको थियो,' उनले लेखेकी छन्, 'बीस वर्षअघि रेडियो नेपालमा समाचार वाचन र गीत गाएर कमाएको पारिश्रमिकले किनेको जग्गामा आज मेरो पसिना र ऋणसँगै उभिएको सपना खरानी बनाइयो।'
आफू सामान्य तर इमानदार परिवारको सदस्य भएको उल्लेख गर्दै कोमलले बाल्यकालदेखि नै खेलाडी र गायिका बनेर प्रतिभा देखाएको बताएकी छन्। गीत गाएरै छात्रवृत्ति पाएको र अध्ययनलाई निरन्तरता दिएको उनको भनाइ छ। रेडियो नेपालमा १८ वर्ष सेवा गरेर राजनीतिमा आएको र २०७४ मा राष्ट्रिय सभा सांसदको रूपमा चार वर्षे कार्यकालभर सकेसम्म सबैको सेवा गरेको उनले बताएकी छन्।
उनले आफ्नो जीवन इमान र निष्ठामा अडिएको दाबी गर्दै आफूले कहिल्यै भ्रष्टाचार नगरेको, उपचार खर्चका नाममा सुविधा नलिएको, आर्थिक प्रलोभनमा नपरेको वा कसैको चियासमेत नखाएको बताएकी छन्। उनले भनेकी छन्, 'यदि म भ्रष्टाचार गरेको प्रमाणित हुन्छ भने गोली खान तयार छु।'
नेकपा एमालेमा परिवर्तन सम्भव हुन्छ भन्ने आशाले आफू आबद्ध भएको स्पष्ट पार्दै उनले कुनै दलमा आवद्ध हुनु नै भ्रष्ट हुनु हो भन्ने कुरा नेपालको संविधानले अस्वीकार गर्ने बताएकी छन्।
उनले जेन–जीको क्रान्ति र परिवर्तनको नाममा युवाको ऊर्जामाथि गर्व गर्ने बताएकी छन्। तर त्यसमा प्रश्न गरेकी छन्, 'के मेरो घर ध्वस्त पार्नु र होटलमा आगो लगाउनु जेन–जीको क्रान्ति हो? ४० जना स्थानीयले पाएको रोजगारी खोस्नु परिवर्तनको मार्ग हो?'
उनले पानीको सेवा दिइरहेका इसर ट्रक र टाटा योद्धा गाडी जलाउनु के साँच्चै आन्दोलनको हिस्सा हो भन्दै समेत प्रश्न गरेकी छन्।
कोमलले २०६१ सालतिर पनि माओवादीहरूले यसरी नै आफ्नो घर लुटेको, बम हानेर जलाएको र सात वर्षसम्म जग्गा कब्जा गरेको समेत बताएकी छन्।
त्यसको पापको फल आज उनीहरूले पाएको टिप्पणी गरेकी छन्। अहिले नयाँ पुस्ताले जेन–जीको नाममा त्यही बाटो दोहोर्याएर अर्को पापको भारी बोकेको उनको भनाइ छ।
यो नियतवश, योजनाबद्ध, भीडमा पसेर गरिएको अपराध भएको र एक निष्कलंक, गरिखाने चेलीको रगत पसिना चुसेर गरिएको महापाप भएको वलीले बताएकी छन्।
उनले अगाडि लेखेकी छन्, 'जब जब मेरो गीत तुलसीपुरमा म जाँदाखेरि बज्नेछ, तिम्रा लुट्ने हात काँप्नेछन्। तिमीहरू पश्चात्तापले चिरिनेछौ।'
नेपालमा कानुनी शासन चल्ने र दोषीहरू कानुनको कठघरामा उभिएर जवाफ दिनुपर्ने उनको भनाइ छ।
-1746009348.jpg)
