कर्णाली क्षेत्रको सामाजिक, राजनीतिक र भौतिक अवस्थालाई पर्दामा उतार्ने उद्देश्यसहित 'रेलको बाटो' नामक फिल्म बन्ने भएको छ।
कस्तुरी प्रोडक्सन प्रालिले रेड अम्ब्रेला इन्टरटेन्मेन्ट प्रालिको सहकार्यमा बनाउन लागेको फिल्मको बिहीबार पोस्टर सार्वजनिक गर्दै औपचारिक निर्माण घोषणा गरिएको हो।
फिल्मको कथा तथा निर्देशन लक्ष्मण सुनारको रहनेछ। निर्माण टिमले सार्वजनिक गरेको थिम पोस्टरमा 'गाउँपालिका भवन उद्घाटन' लेखिएको गेट र तल 'प्रधानमन्त्रीको ज्युलाई स्वागत छ' भन्ने ब्यानर देखिन्छ। उक्त दृश्यले कर्णाली राज्यको लागि ‘दर्शनीय प्रयोगशाला’ मात्र बनेको हो कि भन्ने आलोचनात्मक सन्देश दिने संकेत गर्छ।
यो फिल्ममा संगीत सुरज पण्डितको रहनेछ। छायांकन निशाल पौडेलले गर्नेछन् भने पोस्टर डिजाइन राकेश दाहालले गरेका हुन्। फिल्मका कार्यकारी निर्मातामा नगेन्द्र घिमिरे छन् भने वितरण अधिकार काफिया फिल्म्सले लिएको छ।
सार्वजनिक पोस्टरमा देखिएको 'लैजा तेरो सिंहदरबार, मलाई मेरो गाउँ फिर्ता दे' भन्ने वाक्यले राज्यको उपेक्षामाथि गहिरो भावनात्मक र राजनीतिक संकेत गरेको छ।
निर्देशक सुनारका अनुसार, फिल्मले सामान्य नागरिकको संघर्ष, श्रीमान्–श्रीमतीबीचको सम्बन्ध, र राजनीतिक बेवास्तालाई कथानकको मूल विषय बनाउनेछ। कर्णालीका सडक अभाव, उपचारको कठिनाइ, विकास योजनामा देखिने हस्तक्षेप र शक्ति केन्द्रको नजरन्दाजजस्ता विषयहरू फिल्मको मुख्य कथा हुने जनाइएको छ।
फिल्म यो वर्षको अन्त्यतिर कर्णालीका विभिन्न जिल्लामा छायांकन गरिनेछ र २०८३ सालमा प्रदर्शनमा ल्याइने योजना निर्माण टिमको छ। हाल पटकथा अन्तिम चरणमा रहेको र कलाकारको टुंगो चाँडै लाग्ने निर्माण पक्षले जानकारी दिएको छ।
यसअघि सार्वजनिक भएको 'रेलको बाटो' शीर्षकको गीत र म्युजिक भिडिओले राम्रो चर्चा पाएको थियो। उक्त गीतको भिडिओको निर्देशन पनि लक्ष्मण सुनारले गरेका थिए भने संगीत र स्वर सुरज पण्डितको थियो।
-1746009348.jpg)
