तिहारको लक्ष्मीपूजामा फिल्म 'मायावी' र 'एक्टरः टेक वान' बीच भिडन्त तय भएको छ।
यसअघि कात्तिक १५ गतेलाई 'एक्टर' ले रिलिज मिति तय गरेकोमा 'मायावी' पनि सोही मितिमा आउने भएसँगै बक्स अफिसमा दुई फिल्मको भिडन्त तय भएको हो।
दीवाकर भट्टराईको लेखन एवं निर्देशन रहेको ‘मायावी’ मा पल शाह र दीपिका प्रसाईं मुख्य भूमिकामा छन्। क्रियटिभ सिने आर्टस् प्रालिको प्रस्तुति रहेको यो फिल्मको निर्मातामा राज कटुवाल, चन्द्र पन्त र ध्रुव प्रसाद न्यौपाने छन्।
फिल्मको केही दिनमा फर्स्टलुक सार्वजनिक गर्ने तयारी छ।
त्यस्तै, राजन भुसालको निर्देशन रहेको 'एक्टर' मा प्रदीप खड्का, दिव्या रायमाझी, आना शर्मा लगायत कलाकारहरूको अभिनय छ।
आकाश बराल र राजन भुसालको लेखन रहेको फिल्मको निर्माता थम्मन कुमार भण्डारी हुन्।
नाम चलेका दुई कलाकारको फिल्म लक्ष्मीपूजामा एकै दिन आउने भएपछि बक्स अफिस भिडन्त पनि रोचक हुने अनुमान गरिएको छ।
