गायक एवं अभिनेता प्रकाश सपुतले फिल्म 'वसन्त' निर्माण गर्दैछन्। यो फिल्ममा उनको लेखन, निर्माण, निर्देशन एवं शीर्ष भूमिकामा अभिनय रहनेछ।
छिट्टै छायांकन सुरू गर्ने तयारी रहेको फिल्ममा प्रकाशको जोडीका रूपमा अभिनेत्री स्वस्तिमा खड्काले अभिनय गर्नेछिन्। साथमा अभिनेता अनुप बराल, प्रकाश घिमिरे, कमलमणि नेपाललगायत कलाकारहरूको अभिनय रहनेछ।
गीतलाई कथानक शैलीमा निर्माण गर्दै आएका प्रकाशले फिल्ममा पनि गीतसंगीत पक्षलाई विशेष प्राथमिकता दिने तयारी गरिरहेका छन्।
उनले फिल्म ‘वसन्त’ गीतहरूले बन्ने सामाजिक सञ्जालमा लेखेका छन्।
गीतको दुई लाइनसहित उनी लेख्छन्– 'चलचित्र वसन्त गीतहरुले बन्नेछ। र, गीतहरु जीवन जस्तै हुनेछन, छिनछिनमै बदलिलरहने। तर हामीसँगै हुने हाम्रो हाँसो र आँसु जस्तै। हावा र पानी जस्तै। जन्मिएर भर्खर हाँस्न थालेको आफ्नो सन्तान जस्तै। हेरिरहुँ लाग्ने। वसन्त कथाले भन्दा बढी विचार, भावना र संवेदनाहरूले बन्नेछ! आशा छ तपाईंलाई आफ्नै लाग्नेछ।'
गलबन्दी प्रोडक्सनको प्रस्तुति रहेको फिल्ममा सुनिल वि.क.को सह–निर्देशन रहनेछ। मोहन विश्वकर्मा, अनुरोध भट्टराई र नाना शेरचन कार्यकारी निर्माता रहेको फिल्मको निर्मातामा बिन्दु बोहोरा छिन्। वसन्तलाई चैते दसैंको अवसर पारेर चैत २२ देखि प्रदर्शनमा ल्याइनेछ।
प्रकाश सपुतले नारायण रायमाझी निर्देशित 'परदेशी २' बाट अभिनेताका रूपमा फिल्ममा डेब्यु गरेका थिए।
गतवर्ष रिलिज भएको सुपरहिट भएको थियो। फिल्म 'पूर्ण बहादुरको सारंगी' मा समेत प्रकाशले अभिनय गरिसकेका छन्।
