चर्चित डान्सिङ समूह कार्टुन्ज क्रुले वेब सिरिज 'स्वस्तानी भर्सेस ग्याङ' को पहिलो एपिसोड सार्वजनिक गरेको छ।
सरोज अधिकारीको निर्देशनमा तयार यो सिरिजलाई कार्टुन्ज क्रुकै युट्युब च्यानलबाट स्ट्रिमिङ गरिएको हो।
एड्भेन्चर, कमेडी, रोमान्टिक ड्रामा जनरामा राखिएको सिरिजको शीर्ष भूमिका स्वस्तानीमा आश्मा विश्वकर्माले अभिनय गरेकी छन्। एउटा मोबाइल वरपर केन्द्रित कथावस्तुमा सिरिज बनेको छ।
सिरिजमा आश्मासहित सरोज अधिकारी, लक्ष्मी गिरी, प्रताप दास, विजय अधिकारी, जिवेशसिंह गुरूङ, अभिप्सा खनाल, अस्मिता खनाल, रोशनी कार्की, सोनिया लामा, संगीता शर्मा बस्याल, निकलोस अर्याल, मानश श्रेष्ठ लगायतका कलाकारको अभिनय छ।
पहिलो शृंखलामा आश्मा र प्रतापको लभ इन्ट्रेस्टलाई प्रस्तुत गरिएको छ। विभिन्न सोच भएका युवा पुस्ताका पात्रहरू समावेश गरिएको छ। पहिलो एपिसोड ४४ मिनेटको छ। वेब सिरिजलाई सरोज र सागर खनाल मिलेर निर्माण गरेका हुन्। यसको कथा, पटकथा र संवाद पनि उनीहरूले मिलेर तयार पारेका हुन्।
सिरिजको कार्यकारी निर्मातामा विजय अधिकारी (बन्नी) रहेका छन्। सिरिजका लागि योगेश काजी शाह र सारिका घिमिरेले स्वर दिएका छन्। वेब सिरिजमा संकल भुजेलको छायांकन र सागर खनालको सम्पादन छ।
सिरिजमा कुल १० एपिसोड हुनेछ। ‘हामीले पहिले लभस्टोरी बनाउँथ्यौं। यसपटक भने त्यो जनरा छाडेर कमेडी र एड्भेन्चरतिर लागेका छौं,’ टिमको भनाइ छ।
