अभिनेता मुकुन भुषाल निर्देशन बन्ने भएका छन्। उनले फिल्म 'हेलिकप्टर' निर्देशन गर्न लागेका हुन्।
'यो फिल्म बाल मनोविज्ञानमा आधारित हुनेछ। कुनै बच्चाको दिमागमा हेलिकप्टरको एउटा परिकल्पना छ। त्यही परिकल्पनाको पछि बालक भागिरहेको हुन्छ,' मुकुन भुषालले फिल्मबारे सेतोपाटीलाई भने।
फिल्ममा सुदर्शन थापा, सत्यराज चौलागाईं र बसन्त निरौलाको लगानी रहनेछ। यो फिल्म हलमा प्रदर्शन हुने छैन।
फिल्म राष्ट्रिय तथा अन्तर्राष्ट्रिय फिल्म फेस्टिभलमा प्रदर्शन हुने अभिनेता भुषालले बताए। फिल्मकोे अवधि ४५ मिनेट रहनेछ।
फिल्मको लागि कलाकार छनौट गर्न बाँकी छ। फिल्मको कथा पनि मुकुनले नै तयार पारेका हुन्।
उनी आफ्नो आगामी फिल्म 'गणपति' र 'ऐंचो पैंचो' प्रदर्शनको पर्खाइमा छन्। यी दुवै फिल्म भदौ १४ गतेदेखि प्रदर्शन हुनेछ।
