महामृत्युञ्जय मन्त्रसँग अभिनेत्री मनिषा कोइरालाको पहिलो साक्षात्कार त्यति बेला भयो, जब उनलाई पाठेघरको क्यान्सर भएको थियो।
उनी महाराजगन्जस्थित आफ्नो घरबाट क्यान्सर उपचार निम्ति जान लागेका बेला घरमा महामृत्युञ्जयको हवन चल्दै थियो। मनिषाकी आमाले हवनमा राखिएको माला डाक्टर ची को हातमा राखिदिइन्, जो त्यति बेला मनीषाको शल्यक्रिया गर्दै थिए।
मनिषालाई त्यही महामृत्युञ्जय मन्त्रको बलजस्तो पनि लाग्छ, जसले उनलाई क्यान्सरसँग लड्ने हौसला दियो।
यसरी अनायसै जोडिएको मन्त्रसँग आज मनिषाको कहिल्यै नटुट्ने नाता जोडिएको छ। उनले यो मन्त्र आफ्नै स्वरमा गाएकी छन्।
'यो मन्त्र मेरो जिन्दगीमा एकदमै महत्वपूर्ण छ,' पाटन दरबार संग्रहालयमा बिहीबार उक्त मन्त्रको भजन र म्युजिक भिडिओ सार्वजनिक गर्दै मनिषाले भनिन्, 'आज यही मन्त्र गाउनु मेरो लागि जिन्दगीको फुल सर्कलजस्तै भएको छ।'
बलिउडबाट अभिनय क्षेत्रमा ख्याति कमाएकी मनिषाको यो पहिलो गायन हो। स्रोता-दर्शकले रूचाइदिएमा यसलाई निरन्तरता दिन सक्ने उनले बताएकी छन्।
शिवरात्रिको अवसर पारेर संस्कृतिविद् सत्यमोहन जोशीबाट सार्वजनिक ‘महामृत्युञ्जय मन्त्र’ मा मनिषासँगै सुरसुधा समूहका सुरेन्द्र श्रेष्ठ र सरस्वती खत्रीको स्वर छ। यसलाई सुरेन्द्रले नै संगीतबद्ध गरेका हुन्। यसमा राजीव श्रेष्ठले सितार, प्रेम रानाले बाँसुरी र विकास सिंहले गितारमा साथ दिएका छन्।
'सुरेन्द्रजीलाई मैले तीन वर्षअघि नै आफूलाई भजन गाउन मन लागेको कुरा सुनाएकी थिएँ। त्यो इच्छा ढिलै भए पनि पूरा भएको छ,' कार्यक्रममा मनिषाले भनिन्।
उनले सुरेन्द्र र सरस्वतीका साथमा भजन गाएरसमेत सुनाएकी थिइन्।
अनुप सापकोटाले निर्देशन गरेको म्युजिक भिडिओ टाइम्स म्युजिक स्प्रिचुअल युट्युब च्यानलबाट सार्वजनिक भएको हो।
मनिषाको गीत बिहीबार नेपालसँगै भारतमा मुम्बईस्थित ‘टाइम्स म्युजिक’ बाट सार्वजनिक भएको कार्यक्रममा जानकारी दिइयो।
सबै तस्बिर: नारायण महर्जन/सेतोपाटी
1615486445.jpeg)
-1746009348.jpg)
