पहिलो नेपाली फिल्म 'आमा'की अभिनेत्री भुवन चन्द नयाँ पुस्ताका धेरै कलाकारको नाम याद नभएको बताउँछिन्। काठमाडौंमा आयोजित एक कार्यक्रममा बोल्दै भुवनले अभिनेता अनमोल केसीको नाम बिर्सेकी हुन्।
उनले पहिले र अहिलेको पुस्ताबीच 'जेनेरेसन ग्याप' भएको बताइन्। उनले अनमोललाई अभिनेता तथा निर्माता भुवन के.सीको छोरा भनेर चिन्ने बताइन्। कार्यक्रममा बोल्दै भनिन्, 'म त्यो बाबुलाई भुवन केसीको छोरा भनेर चिन्छु।'
नयाँ पुस्ताका अभिनेतामध्ये अनमोल र अभिनेता प्रदीप खड्काको उदाहरण दिँदै भुवनले उनीहरूमा बेग्लै विशेषता भएको बताइन्। उनले आफूलाई अनमोल केसीको हेराइ र प्रदीप खड्काको हाँसो राम्रो लाग्ने बताइन्। 'सायद त्यही हेराइ र हाँसोमा निर्माताले लगानी गरेका र दर्शकहरूले मन पराएका होलान्,' उनले भनिन्।
त्यस्तै अभिनेत्री भुवनले कार्यक्रममा बोल्दै आफूले पाउने पारिश्रमिक प्रस्तावमा पनि गुनासो पोखिन्। फिल्ममा आमा र हजुरआमा पात्रका लागि अझै प्रस्ताव आउने भएता पनि चित्त बुझ्दो पारिश्रमिक नमिल्ने उनको भनाइ हो। प्रस्तावित पारिश्रमिकबारे भुवन भन्छिन्, 'उहाँहरूको प्रस्तावित पारिश्रमिक सुन्दा लाजमर्दो हुन्छ। मेरो घरमा माली हुनुहुन्छ। जति निर्माताले मेरो पारिश्रमिक तोक्नुहुन्छ, त्यति त म मेरो मालीलाई तलब दिइरहेको छु।'
फिल्ममा मुख्य भूमिकामा रहेका कलाकारहरूले बढी पारिश्रमिक पाउने गर्छन्। भुवन आफूले फिल्म क्षेत्र बुझेको बताउँछिन्। तर यसो भन्दैमा आफूले पाउनुपर्ने पारिश्रमिकबारे किचकिच गर्न मन नहुने बताइन्। भनिन्, 'कति गर्ने भन्ने हुन्छ। त्यसैले अचेल प्रस्ताव आउँदा केही नभनी तपाईंको फिल्ममा खेल्न सक्दिनँ मात्रै भन्छु।'
-1746009348.jpg)
