अभिनेता पल शाह र चलचित्रकर्मी महासंघ प्रदेश नम्बर १ का अध्यक्ष अरुण प्रधान बीचको विवाद सहमतिमा टुंगिएको छ।
म्युजिक भिडियो सुटिङका लागि धरान आएका अभिनेता पल शाह (पूर्णविक्रम शाह) र चलचित्रकर्मी महासंघ प्रदेश १ का अध्यक्ष अरुण प्रधानबीचको विवाद शुक्रबार अबेर मिलेको हो।
इलाका प्रहरी कार्यालय धरानका डिएसपी ज्ञानेन्द्र बस्नेतका अनुसार दुबै पक्षले आफ्नो पक्षबाट भएको गल्ती स्वीकार गर्दै माफी मागेपछि विवाद मिलेको हो।
‘पलले माफी मागेपछि झगडा मिलेको हो। प्रधानमाथि हात पात गर्ने पलका सहयोगी कृष्णप्रसाद जोशीले पनि आफुले गल्ति गरेको स्विकार गर्दै माफी मागेका थिए। त्यस्तै प्रधानले पनि आफुले आवेगमा बोलेका कुरा प्रति माफी मागे’, डिएसपी बस्नेतले भने।
विवाद मिलेपछि पल र अरुणले हात मिलाएर प्रहरी कार्यलयबाट हाँस्दै बाहिरिएका थिए। एक म्युजिक भिडियोको सुटिङका लागि धरान पुगेका पलको निर्देशनमा उनका सहयोगी कृष्णप्रसाद जोशीले आफूमाथि आक्रमण गरेको आरोप लगाउँदै पल बिरुद्ध प्रधानले इलाका प्रहरी कार्यालय धरानमा केही दिन अगाडि उजूरी दर्ता गराएका थिए।
प्रहरीले दुवै पक्षलाई बोलाएर छलफल गरेपछि झगडा मिलेको हो।
शुक्रबार बिहान पनि प्रधानले आफूसँग पलले निखित माफी माग्नुपर्ने भन्दै एक विज्ञप्ति समेत जारी गरेका थिए। विज्ञप्तिमा प्रधानले पलले आफुसँग माफी नमागे प्रदेश नम्बर १ भर उनको फिल्म चल्न नदिने चेतावनी समेत दिएका थिए। पल म्युजिक भिडियो सुटिङका लागि केही दिन अगाडि धरान पुगेका थिए।
-1746009348.jpg)
