नेपाल चलचित्र संघले पुस १० गतेदेखि सिनेमा हल खोल्ने निर्णय गरेको छ।
संघले नेपाल सरकारको स्वास्थ्य सुरक्षा विधि तथा डब्लु एच ओको सुरक्षा मापदण्ड अपनाइ चलचित्र घरहरु सञ्चालन गर्ने बताएको छ। सरकारसँग पटकपटक आग्रह गर्दा हल खोल्ने कुनै नीति निर्णय नआएपछि आक्रोशित भएर सिनेमाकर्मीहरुले हल सञ्चालन गर्ने निर्णय गरेका हुन्।
संघले विज्ञप्ती सार्वजनिक गर्दै सरकारलाई बुदाँगत रुपमा दबाब दिएको छ। संघले हवाई, बस व्यवसाय, होटल, रेष्टुरेन्ट, मन्दिर लगायत अन्य क्षेत्र पूर्ण रुपमा सञ्चालन भईसकेकोमा सिनेमा क्षेत्र सञ्चालनको लागि सरकारबाट केही कदम नचालिएको भन्दै गुनासो गरेको छ।
साथै संघले पुस १० गतेदेखि चरणबद्ध रुपमा आन्दोलन गर्ने निर्णय समेत गरेको छ। विज्ञप्तीमा मनोरञ्जन कर खारेज गर्ने, चलचित्र प्रदर्शन व्यवसायले उद्योगको मान्यता पाउनुपर्ने, चलचित्र विकास शूल्क खारेज हुनुपर्ने, चलचित्र घरको लागि आवश्यक उपकरण तथा सामाग्रीहरु भन्सार महशुल छुट हुनु पर्ने, चलचित्र क्षेत्रलाई अति प्रभावित क्षेत्रको रुपमा सम्बोधन गर्नुपर्ने माग राखिएको छ।
यसैबीच सरकारले ९ महिनापछि फिल्म छायांकन फुकुवा गरेको छ। सोमबार फिल्म निर्माता संघका अध्यक्ष आकाश अधिकारीसँगको भेटमा उपप्रधानमन्त्री ईश्वर पोखरेल तथा सूचना तथा सञ्चारमन्त्री पार्वत गुरुङले यसै साता पत्रकार सम्मेलनबाट छायांकन खुल्ला गर्ने बताएका हुन्।
संघका अध्यक्ष अधिकारीले दुई मन्त्रीसँगको भेटका तस्विर सामाजिक सञ्जाल फेसबुकमा पोस्ट गर्दै छायांकन स्थल खुल्ला गरिन लागेको बारे जानकारी गराएका हुन्। फिल्म हल भने सरोकारवाला संघ–संस्थासँग छलफल गरेर मात्र खोल्ने जानकारी प्राप्त भएको बताए। फिल्मकर्मीले माग राख्दै आएको फिल्म क्षेत्रलाई अति प्रभावित क्षेत्रमा सुचिकृत गर्ने कुरामा पनि सहमती भएको कुरा अधिकारीले सामाजिक सञ्जालमा उल्लेख गरेका छन्। उक्त भेटमा अभिनेता शिव श्रेष्ठ पनि उपस्थित थिए ।
-1746009348.jpg)
