गायक देवेन्द्र बब्लु र एलिना चौहानको स्वरमा नयाँ गीत सार्वजनिक भएको छ। 'मयाले नि के के गर्च गर्च' बोलको यो गीतमा देवेन्द्र र रोशनी कार्कीको प्रस्तुति देख्न सकिन्छ।
उक्त म्युजिक भिडिओमा देवेन्द्रकै अवधारणा र कथा छ। उनकै संगीतमा तयार यो गीतमा शब्द भने हर्क साउदले दिएका छन्।
भिडिओमा द्वन्दकालीन समयको प्रेम देखाउन खोजेको छ। देवेन्द्र र रोशनी कमरेड हुन्। उनीहरू तालिमक्रममा प्रेममा पर्छन्। उनीहरूको सल्लाहकारका अनुसार प्रेमले मान्छेलाई भावनामा डुबाउँछ र कमजोर बनाउँछ। उद्देश्य प्राप्त गर्न बाधा पुर्याउँछ।
कमरेड देवेन्द्रका अनुसार प्रेमले मान्छेलाई बलियो बनाउँछ। त्यसैले उनीहरू एकअर्काको प्रेममा बाधिन्छन्।
तर युद्धक्रममा कमरेड रोशनी मारिन्छिन्। कमरेड देवेन्द्र छताछुल्ल हुन्छन्। तर उनलाई सल्लाहकारले त्यस स्थानबाट जेनतेन लैजान्छन्।
भिडिओमा देखाइएको प्रेम बुझ्न गायक देवेन्द्रले द्वन्द्वकालीन समयबारे अध्ययन गरे। उनलाई ख्याल आएको थियो। त्यो बेला पनि माया त थियो होला। लुकीलुकी प्रेम गर्थे होला। भावना व्यक्त गर्थे होला। तर केही भिन्नै थियो होला।
यी कुराले घोच्न थालेपछि देवेन्द्रले द्वन्दमा हिँडेका केही व्यक्ति र त्यसैक्रममा भेटेर विवाह गरेका दम्पत्तीहरूका कथा सुने।
'उहाँहरूसँग भेटेपछि मलाई अझ बढी खुशी लाग्यो। उहाँहरूको कथा सुन्दा त्यसबेलाको प्रेम बुझे,' देवेन्द्र भन्छन्, 'त्यसपछि नै भिडिओमा काम थाल्यौ।'
भिडिओको अन्तमा कमरेड रोशनी मारिएपछि सबैले उनलाई त्यही छाडेर गएको देखाइन्छ। 'द्वन्दमा प्रेममा रहे पनि आफ्नो उदेश्यमा अड्नुपर्छ भन्ने हुन्थ्यो रे। त्यही अनुरूप त्यहाँ त्याग पनि देखाइएको हो,' देवेन्द्रले भने।
भिडिओलाई विशाल घिमिरेले निर्देशन गरेका हुन्। देवेन्द्र र रोशनीसँगै भिडिओमा प्रकाश घिमिरे, कार्बिर घैरे, सुदीप घमिरे र सुभाष तिमल्सिनाको प्रस्तुति छ।
'मयाले नि के के गर्च गर्च' शुक्रबार देवेन्द्र बब्लुको आधिकारिक युट्युब च्यानलमार्फत सार्वजनिक भएको हो।
-1746009348.jpg)
