सुरज कुमार थापाका गीत सुन्नेहरुले उनलाई 'पश्चिम कोही पूर्व घर' र 'यसपालि त जन्तेबाख्रो खान पाइने भो' जस्ता गीतबाट चिन्लान्। कसैले उनलाई नेपथ्य ब्यान्डका सदस्य त कसैले 'पलेटी' का वाद्यवादक तथा गायकका रुपमा पनि चिनेका होलान्। उनलाई चर्चित लोकगायिका तीर्थ कुमारी थापाका छोराका रुपमा चिन्नेहरुको पनि कमि नहोला।
जसरी चिने पनि सुरजको मूल परिचय संगीतसँग जोडिएको छ। सांगीतिक परिवारमा जन्मेका उनले यो क्षेत्रमा झन्डै तीन दशक बिताइसकेका छन्।
उनै सुरजले हालै नयाँ गीत सार्वजनिक गरेका छन्, नौ डाँडापारी। यो उनको 'चिनारी' एल्बमा समावेश गीत हो। यसअघि लकडाउनकै समयमा उनले चिनारी 'एल्बम' कै गीत सार्वजनिक गरेका थिए।
लकडाउनको समयमा आफ्ना पुराना गीतहरुको लिरिकल भिडियो बनाएर समय कटाएका उनी बिस्तारै अरु गीतहरु सार्वजनिक गर्दै जाने बताउँछन्।
आफ्नै युट्युब च्यानलबाट गत सार्वजनिक गरेको नौ डाँडा पारी गीत गीतकार तथा कवि मंजुलले लेखेका हुन्। विनोद स्याङदेनको संगीत रहेको यो गीतको संगीत संयोजन सुरज आफैंले गरेका हुन्।
रोमान्टिक प्रेमभाव बोकेको गीतको भिडियोमा गायक सुरजलाई अभिनयमा उनकी श्रीमती देवकी बोहराले साथ दिएकी छिन्। भिडियोका परिकल्पनाकार र निर्देशक सन्तोष बस्नेत हुन्। सरन महर्जनको फोटोग्राफी निर्देशन, धमेन महर्जनको छायांकन, निरू बस्नेतको मेकअप, शिबु श्रेष्ठको सम्पादनमा भिडियो तयार भएको हो।
गायक तथा संगीतकार अम्बर गुरुङसँग औपचारिक संगीत सिकेका सुरजका तीन ओटा एकल एल्बम सार्वजनिक छन्।यसबाहेक थुप्रै कलेक्सन एल्बमा स्वर दिएका उनले 'घर संसार', 'अबला' आदि फिल्ममा समेत गीत गाएका छन्।
विगत १७ वर्षदेखि उनले नेपथ्य ब्यान्डमा रही विश्वका विभिन्न देशमा सांगीतिक भ्रमण गरिसकेको छन्। करिब बीस वर्षदेखि उनी विभिन्न स्कुलमा संगीत पनि सिकाउँदैछन्।
सुरजले नेपालयबाट सञ्चालन हुँदै आएको लाइभ सांगीतिक कार्यक्रम 'पलेटी' मा गायक, संगीतकार तथा संगीत संयोजकका लामो अनुभव बटुलेका छन्।
यसैमञ्चमा उनले राष्ट्र कवि माधव प्रसाद घिमिरे, अम्बर गुरुङ, प्रेमध्वज प्रधान, फत्तेमान, रत्नशमशेर थापा, शान्ति ठटाल, किरण खरेल, दीप श्रेष्ठ जस्ता मुर्धन्य सर्जकका साथमा प्रस्तुति दिएका छन्। नेपाली सुगम संगीतको स्वर्णीम कालका सर्जकहरुसँग सहकार्य गरेका उनी आफैं पनि त्यही धारबाट प्रभावित रहेको बताउँछन्।
यो नयाँ गीत नौ डाँडापारीमा मैले त्यही धारको संगीत शैलीलाई निरन्तरता दिने प्रयास गरेको छु, सेतोपाटीसँग टेलिफोन मार्फत उनले भने।
-1746009348.jpg)
