अन्तर्राष्ट्रिय वाटरकलर सोसाइटी (आइडब्लुएस) नेपालले 'कला डेमोन्सट्रेसन' कार्यक्रम मार्फत विश्व रेकर्ड राख्न पहल गर्दैछ। आइडब्लुएस नेपालले आफ्नो स्थापनाकालदेखि नै विभिन्न कार्यक्रम गर्दै आएको छ। आइडब्लुएस नेपालले अन्तर्राष्ट्रिय रुपमा नेपाली कलाकारको कलाकृति प्रदर्शनीमा राख्ने र तिनको प्रचारप्रसार गर्ने काम गर्दै आएको छ।
साथै, विभिन्न कला कार्यक्रममा नेपाली कलाकारलाई सहभागी गराउने र ख्यातिप्राप्त विदेशी कलाकार नेपालमा निम्त्याउने र उनीहरुको कलाकृति नेपालमा प्रदर्शन गर्ने-गराउने काम गर्छ।
यसैबीच यसले दुई पटक अन्तर्राष्ट्रिय कार्यक्रमसमेत संचालन गरिसकेको छ। आइडब्लुएस नेपालकै पहलमा विभिन्न मानवीय सहयोगका कार्यक्रम भइरहेका छन्। कोभिड-१९ महामारी सुरु भएयता आइडब्लुएसले अनलाइन माध्यमबाट विभिन्न कला प्रदर्शनीहरु समेत गरिरहेका छन्।
यसैबीच आइडब्लुएस नेपालले नयाँ शृखंला सुरु गर्ने भएको हो। यस अन्तर्गत नयाँ कार्यक्रम आयोजना गर्दैछ। उक्त कार्यक्रममा कोरोना भाइरस र यसले निम्त्याएको समस्यालाई सम्बोधन गर्ने र यस विरुद्ध लड्न आह्वान गर्ने आइडब्लुएसका महासचिव दिपेन्द्रमान बनेपालीले बताए।
कला प्रदर्शनी कात्तिक २३ देखि २७ गतेसम्म चल्नेछ। अर्थात् ४ दिन, ४ रात, ४ घण्टा (१०० घण्टा)। भर्चुअल माध्यमबाट संचालन हुने यो कार्यक्रममा ७३ जना नेपाली कलाकार सहभागी हुनेछन्। उक्त कार्यक्रमलाई विश्वमै सबैभन्दा लामो रिले कला डेमोन्सट्रेसनको रुपमा विश्व रेकर्डको लागि पहल गरिने महासचिव दिपेन्द्र बताउँछन्।
यसले नेपाली कलाकारलाई विश्वसामु चिनाउने र नेपाली कलाको शिर ठाडो बनाउन संकल्प लिने विश्वास राखेको छ। यो अनलाइन डेमोन्सट्रेसनमा बनेका कलाकृतिको प्रदर्शनी, सहभागी कलाकारको चिनारी पुस्तक र भिडीओ प्रदर्शनी गरिनेछ।
-1746009348.jpg)
