नेपाल आर्मी ‘ए’ ले थ्री बाइ थ्री पुरुष बास्केटबल प्रतियोगिताको उपाधि आइतबार जितेको छ।
त्रिपुरेश्वरस्थित राष्ट्रिय खेलकुद परिषद् (राखेप) को सेमी कभर्डहलमा भएको प्रतियोगिताको फाइनलमा आर्मी ‘ए’ ले गोल्डेनगेट ‘ए’ लाई २१–१५ ले पराजित गर्यो।
उपाधिसँगै आर्मीले ४० हजार नगद पुरस्कार पायो। उपविजेता गोल्डेनगेटले २० हजार नगद पुरस्कारमा चित्त बुझायो।
नेपाल बास्केटबल संघको सहयोगमा ललितपुर जिल्ला बास्केटबल संघद्वारा आयोजित प्रतियोगितामा आर्मी ‘ए’का विनोद महर्जन ‘मोस्ट भेलुएबल प्लेयर’ घोषित भए। उनले १० हजार नगद पुरस्कार प्राप्त गरे।
विजेतालाई नेपाल बास्केटबल संघका अध्यक्ष भीमसेन गुरुङ, महासचिव नरेन्द्र थापालगायतले पुरस्कृत गरे। तीनदिने प्रतियोगितामा २० टिमले लिग कम नकआउट आधारमा प्रतिस्पर्धा गरेका थिए।
