युवा तथा खेलकुद मन्त्रालयले राष्ट्रिय खेलकुद परिषद्का उपाध्यक्ष टेन्डी शेर्पालाई जिम्मेवारीबाट मुक्त गरेको छ।
युवा तथा खेलकुद मन्त्री राजेन्द्रकुमार केसी (राजन) ले मंगलबार राष्ट्रिय खेलकुद परिषदलाई पत्र लेख्दै उपाध्यक्ष लामा टेन्डी शेर्पालाई खेलकुद सम्बन्धी कुनै काम नलगाउन निर्देशन दिएका छन् ।
टेन्डीविरुद्ध करिब तीन वर्ष अघिदेखिनै फौजदारी मुद्दा चलिरहेका कारण भन्सार कार्यालयबाट प्राप्त पत्रका आधारमा राखेपका अध्यक्ष समेत रहेका मन्त्रीले मंगलबार यस्तो निर्देशन दिएका हुन्।
सुन काण्डमा मुसिएका शेर्पालाई भन्सारबाट प्राप्त पत्रको आधारमा मुद्दाको किनारा नलाग्दा सम्म खेलकुदको कुनै पनि काम नगर्नू नगराउनू भनि मन्त्री केसीले निर्देशन दिएका हुन्।
नेकपा एमालेको भातृ संगठन नेपाल खेलकुद महासंघका महासचिव समेत रहेका शेर्पा अन्तर्राष्ट्रिय मान्यता प्राप्त नेपाल ओलम्पिक कमिटी (एनओसी) का महासचिव र नेपाल बास्केबट संघका अध्यक्ष हुन्। उनी एमालेको सिफारिसमा तीन वर्षअघि राखेप उपाध्यक्षमा मनोनित भएका थिए ।
हङकङबाट काठमाडौं फर्कने क्रममा भन्सार छलेर करिब २५ तोला सुन ल्याउँदै गर्दा शेर्पा २०७१ चैत १४ गते त्रिभुवन अन्तराष्ट्रिय विमानस्थलबाटै पक्राउ परेका थिए।
शंका लागेर चेकजाँच गर्दा लामाको साथबाट सुन बरामत भएको बताइएको थियो । पछि उनी १३ लाख रुपैयाँ धरौटीमा छुटेका थिए।
