अखिल नेपाल फुटबल संघ (एन्फा) र क्लबहरूबीचको विवादका कारण नियमित सञ्चालन हुन नसकेको सहिद स्मारण बी डिभिजन लिग शनिबारबाट सुरू हुँदैछ।
पछिल्लो पटक २०७८ सालमा भएको लिग अन्तत: २०८१ को फागुनबाट सञ्चालन हुन लागेको हो।
यो सिजनको लिगको उद्घाटन शनिबार दशरथ रंगशालामा हुनेछ। पहिलो खेलमा शनिबार च्यासल युथ क्लब र वीरगञ्ज युनाइटेडबीच हुनेछ।
लिग सिंगल राउन्ड रोविनका आधारमा हुनेछ भने कुल ९१ वटा खेलहरु संचालन हुनेछन्।
प्रतियोगिताको खेलहरु त्रिपुरेश्वरस्थित दशरथ रंगशालामा र सातदोबाटोस्थित एन्फा कम्प्लेक्स सातदोबाटोमा खेलाइनेछ।
प्रतियोगितामा देशभरका १४ क्लबहरु सभागी छन्। जसमा रानीपोखरी कर्नर टिम (आरसिटी), श्री भगवती, टुसाल यथ, ब्रिगेड व्वाइज, ब्वाइज युनियन, मध्यपुर युथ, च्यासल युथ, श्री कुमारी, बाँसबारी, नयाँ बस्ती युथ, सरस्वती युथ, वीरगञ्ज युनाइटेड, झापा फुटबल क्लब र प्लानिङ्ग व्याइज युनाइटेडको सहभागिता रहनेछ ।
एन्फाले यस प्रतियोगिताको लागि सम्पूर्ण तयारीहरु पूरा गरेको शुक्रबार जानकारी दिएको छ। प्रतियोगिताको मार्केटिङ, टिकेटिङ र ब्रोडकास्टिङ अधिकार एमडिएसी स्पोर्ट्सलाई प्रदान गरिएको छ।
प्रतिगोगिताको टिकट दर दशरथ रंगशालामा सामान्य पारापिटतर्फ १०० र भीआइपी पारापिटतर्फ ३०० रुपैयाँ तय गरिएको छ। त्यस्तै एन्फा कम्प्लेक्स सातदोबाटीमा सामान्य पारापिटतर्फ रु १०० कायम गरिएको छ।
प्रतियोगिताका सम्पूर्ण खेलहरु प्राइभ टेलिभिजन र प्राइभ टेलिभिजनको युटयुब च्यानलबाट प्रत्यक्ष प्रसारण गरिनेछ।
प्रतियोगिताको विजेता, उपविजेता तथा अन्य व्यक्तिगत विधातर्फ उत्कृष्ट खेलाडीलाई पनि प्रस्कृत गरिनेछ।
प्रथम पुरस्कारः १५ लाख
द्वितीय पुरस्कारः १० लाख
तृतीय पुरस्कार: ५ लाख
फेयर प्ले: १ लाख
उत्कृष्ट खेलाडीः १ लाख
उत्कृष्ट गोलकिपरः ५०,०००
सर्वाधिक गोलकर्ता:५०,०००
प्लेयर अफ दि म्याच: .रु ७,५००
प्रतियोगिताको एक खेलमा विजयी टोलीली थप रु २५ हजार र खेल बराबरी भएको खण्डमा दुवै टिमलाई रु १० हजार प्रदान गरिनेछ। प्रतियोगिताको कुल बजेट ३ करोड ९३ लाख रुपैयाँ रहेको छ।
