नेपाली राष्ट्रिय टिमका डिफेन्डर रोहित चन्दले भारतविरुद्ध आज हुने खेलका लागि नेपाली टिमलाई शुभकामना दिएका छन्।
रोहितले चाहेर पनि नेपालविरुद्धको खेलका लागि उपस्थित हुन नसकेकोमा दु:ख समेत व्यक्त गरेका छन्।
रोहित इन्डोनियन क्लब पेर्सिजा जाकार्तामा आबद्ध छन्। जसका कारण उनी अहिले इन्डोनेसियामा छन्।
'भारतविरुद्धको खेलका लागि चाहेर पनि उपस्थित हुन नसकेकोमा एकदमै दु:खित छु। भौतिकरूपमा जाकार्तामा रहे पनि मेरो मन-मष्तिस्क दशरथ रंगशालामा नै हुनेछ,' उनले सामाजिक सञ्जाल फेसबुकमा लेखेका छन्।
'इन्डोनेसिया आएपछि ८ दिन अनिवार्य क्वारेन्टिन बस्नु पर्ने नियमका कारण प्राविधिक रुपमा नेपाल आउन सम्भव नभएको सबैलाई जानकारी गराउन चाहान्छु। यो विषयमा यसअघि नै एन्फालाई जानकारी गराइसकेको छु। नेपाल आएको अवस्थामा मेरो १६ दिन त्यसै 'लस' हुने अवस्थामा यो समयमा आफूलाई तयारी राख्दै प्रतिस्पर्धामा निखाँरिने मेरो योजना हो।'
उनले भारतविरुद्धको खेलले साफ च्याम्पियनसिपका लागि फाइदा पुग्ने बताउँदै आफू पनि साफकै तयारीमा केन्द्रीत हुने बताएका छन्।
गत चैतमा भएको थ्री नेसन्स कपमा रोहितले उत्कृष्ट प्रदर्शन गरेका थिए। प्रतियोगितामा उनले उत्कृष्ट खेलाडीको अवार्ड समेत हात पारेका थिए। दशरथ रंगशालामा भएको सो प्रतिस्पर्धामा नेपालले बंगालदेशलाई हराएर उपाधि जितेको थियो।
-1746009348.jpg)
