स्पेनिस महारथी क्लब बार्सिलोनाका फरवार्ड लिओनल मेसीले गत सिजनको अन्त्यमा क्लब छाड्न गरेको प्रयास सफल हुन सकेन।
गत अगस्टमा मेसीले आफूले बार्सिलोना छाड्न चाहेको बताउँदै सहयोग गर्नका लागि क्लबसँग आग्रह गरेका थिए। मेसीले फ्रि-ट्रान्सफरमा बार्सिलोना छाड्न चाहे पनि बार्सिलोनाले रिलिज क्लज राखेको थियो।
बार्सिलोनाले ७ सय मिलियन युरोको रिलिज क्लज राखेपछि अन्य क्लबले मेसीलाई भित्र्याउन असम्भव जस्तै बनेको थियो।
'मैले सिजनको सुरुमा सबैकुरा बिस्तारै बाँनी पार्न थाले,' ३३ वर्षीय मेसीले स्पेनिस टेलिभिजन च्यानल ला सेक्स्टासँग कुरा गर्दै भनेका छन्,'अहिले म ठिक भएको साँचो हो। तर गएको समर मेरा लागि एकदमै खराब समय रह्यो।'
मेसीले गएको शनिबार ब्राजिलका महान् खेलाडी पेलेसँगको कीर्तिमान बराबरी गरेका थिए। बार्सिलोनाका लागि ६४३ गोल गर्दै मेसीले सर्वाधिक क्लब गोल गर्ने खेलाडीको सूचीको दोस्रो स्थानमा रहेका पेलेको कीर्तिमानसँग बराबरी गरेका थिए।
जारी सिजनमा बार्सिलोनाका लागि मेसीले १७ खेल खेल्दा ९ गोल गरेका छन्। बार्सिलोना ला लिगाको अंक तालिकामा अहिले पाँचौ स्थानमा छ।
यो सिजन पछि मेसी र बार्सिलोनाबीचको सम्झौता सकिँदैछ। त्यसपछि मेसी अन्य क्लबमा जानका लागि स्वतन्त्र हुनेछन्। सम्झौता सकिनु ६ महिनाअघि अन्य क्लबसँग सम्झौता गर्न पाउने प्रावधानअनुसार मेसीले आगामी जनावरी १ मै अर्को क्लब रोज्न सक्नेछन्।
बार्सिलोनाका अन्तरिम अध्यक्ष कार्लोस टुस्क्युटले मेसीलाई गत सिजन नै अन्य क्लबमा बोच्नु पर्ने धारणा राखिरहेका छन्।
यस्तै बार्सिलोनाले गत नोभेम्बरमा खेलाडीको तलब कटौती गर्ने निर्णय गरेको थियो। २६ पटक ला लिगाको उपाधि जितेको बार्सिलोनाले कोरोनाका कारण प्रभाव परेकोले १२२ मिलियन युरो तलब कटौती गर्ने निर्णय गरेको थियो।
'अहिले म एकदमै ठिक छु। अगाडि रहेका प्रतियोगिताका लागि प्रतिस्पर्धा गर्न चाहिरहेको छु,' मेसीको भनाइ छ,'क्लब मैदान र मैदानबाहिर अप्ठेरो परिस्थितिमा रहेको मलाई थाहा छ। तर म अझै उत्साहित छु।'
-1746009348.jpg)
