जर्मन क्लब वायर्न म्युनिखका स्ट्राइकर रोबर्ट लेवान्डोस्कीले द वेस्ट फिफा मेन्स प्लेयर अवार्ड जितेका छन्।
पोल्यान्डका ३२ वर्षीय स्ट्राइकर लेवान्डोस्कीले शीर्ष तीनमा परेका लिओनल मेसी र क्रिस्टियानो रोनाल्डोलाई पछि पार्दै बिहीबार राति जुरिचमा भर्चुअल माध्यमबाट घोषणा गरिएको अवार्ड जितेका हुन्।
गत सिजन वार्यनलाई युरोपियन च्याम्पियन्स लिग, जर्मन बुन्डेसलिगा र लिग कप गरी तीन वटा मुख्य उपाधि जिताउने क्रममा लेवान्डोस्कीले ४७ खेलमा ५५ गोल गरेका थिए।
लेवान्डोस्कीले पहिलो पटक फिफा अवार्ड हात पारेका हुन्।
महिलातर्फको अवार्ड म्यानचेस्टर सिटीकी डिफेन्डर लुसी ब्रन्जले हात पारेका छिन्।
विश्वभरका राष्ट्रिय फुटबल टिमका कप्तान र प्रशिक्षक तथा मिडिया प्रतिनिधिको भोटको आधारमा विजेता घोषणा गरिएको हो।
लिभरपुलका प्रशिक्षक जुर्गेन क्लोपले पुरुष टिमको प्रशिक्षक तथा नेदरल्यान्ड्स महिला राष्ट्रिय टिमकी प्रशिक्षक स्यारिना विगम्यानले महिला टिमको प्रशिक्षकको अवार्ड जितेका छन्।
जर्मन क्लब वायर्नका म्यानुयल नेउरले उत्कृष्ट गोलकिपरको अवार्ड हात पारेका छन्।
फिफा पुस्कस अवार्ड टोटनह्यामका सन मिनले हात पारेका छन्।
-1746009348.jpg)
