इंग्लिस प्रिमियर लिगमा साविक विजेता लिभरपुल अंक तालिकाको शीर्ष स्थानमा उक्लिएको छ।
बुधबार राति भएको खेलमा टोटेनहमलाई २-१ गोलले पराजित गरेर लिभरपुल शीर्ष स्थानमा पुगेको हो। हारसँगै टोटेनहम भने दोस्रो स्थानमा झरेको छ।
खेलको २६ मिनेटमा मोहमद सलाहको गोलबाट लिभरपुलले अग्रता लियो।
३३ मिनेटमा टोटेनहमले बराबरी गोल फर्कायो। उसका लागि सन मिनले लो सेल्सोको पासमा बराबरी गोल गर्न सफल भए।
खेलको अन्तिम मिनेटमा लिभरपुलले दोस्रो गोल गर्दै रोमाञ्चक जित हात पार्न सफल भयो। लिभरपुलका लागि फिर्मिनोले ९० मिनेटमा दोस्रो गोल गरेका थिए।
लिगका अर्को खेलमा आर्सनललाई १-१ गोलको बराबरीमा रोक्दै साउथह्याम्टन अंक तालिकाको तेस्रो स्थानमा उक्लिएको छ।
यता चौथो स्थानको लेस्टरलाई एभर्टनले २-० गोलले पराजित गरेको छ भने न्युकासलमाथि लिड्सले ५-२ गोलको जित हात पारेको छ।
लिगको अंक तालिकामा लिभरपुल १३ खेलबाट २८ अंक जोड्दै शीर्ष स्थानमा छ। दोस्रो स्थानमा झरेको टोटेनहमको २५ अंक छ।
तेस्रो स्थानको साउथह्याम्टन र चौथो स्थानको लेस्टरको समान २४-२४ अंक छ।
एभर्टन २३ अंकसहित पाँचौ र चेल्सी २२ अंकसहित छैटौं स्थानमा छन्।
-1746009348.jpg)
