इटालियन क्लब युभेन्ट्सका पोर्चुगिज स्ट्राइकर क्रिस्टियानो रोनाल्डोले स्पेनिस महारथी बार्सिलोनाका फरवार्ड लिओनल मेसीलाई कहिल्यै पनि प्रतिद्वन्द्वीको रूपमा नहेरेको बताएका छन्।
युरोपियन च्याम्पियन्स लिगअन्तर्गत मंगलबार राति बार्सिलोनाविरुद्धको खेलपछि रोनाल्डोले यस्तो प्रतियक्रिया दिएका हुन्।
बार्सिलोनाको मैदानमा भएको समूह 'जी' को खेलमा युभेन्ट्सले ३-० को जित हात पारेको थियो।
जसमा रोनाल्डोले दुई गोल गरेका थिए। दुवै गोल रोनाल्डोले पेनाल्टीबाट गरेका थिए।
खेलमा मेसीले ११ प्रहार गरेका थिए। जसमा ७ प्रहार पोस्टमै ताकेर हाने पनि गोलमा परिणत हुन भने सकेन।
रियल म्याड्रिड छाडेर युभेन्ट्स जानुअघि रोनाल्डो र मेसीबीच ९ सिजन स्पेनिस फुटबलमा आमनेसामने भएको थियो।
फुटबलमा प्रतिस्पर्धा हुनु स्वभाविक भएको बताउँदै रोनाल्डोले मेसीसँग कहिल्यै प्रतिद्वन्द्वीको भावना नराखेको बताएका हुन्।
'मेरो मेसीसँग सधैं धेरै सौहार्दपूर्ण सम्बन्ध भएको छ,' रोनाल्डोले भने,'१२, १३ वा १४ वर्ष पुरस्कार समारोहमा उनीसँगै रहे। मैले उनलाई कहिले पनि प्रतिद्वन्द्वीको रूपमा हेरिनँ।'
'उनले सँधै आफ्नो टिम र मेरा लागि पनि राम्रो गर्न कोशिस गरे। मैले उनीसँग सधै राम्रै साथ पाएँ।'
उनले अघि भने,'तर हामीलाई थाहा छ कि फुटबलमा प्रेसका लागि, कार्यक्रमको लागि, प्रतिस्पर्धाको खोजी हुन्छ, तर म उनीसँग सधैं राम्रो हुन्छु। म उनलाई सधैँ उस्तै देख्छु।'
-1746009348.jpg)
