प्रधानमन्त्री केपी शर्मा ओलीले नेपाल प्रिमियर लिग (एनपिएल) को दोस्रो संस्करण आयोजनाको तयारी अगाडि बढाउन निर्देशन दिएका छन्।
राष्ट्रिय खेलकुद परिषदले अन्तर्राष्ट्रिय खेलकुद परिषर सातदोबटोमा निर्माण गरेको ‘नेसनल हाइ पर्फमेन्स सेन्टर’ को उद्घाटन कार्यक्रममा प्रधानमन्त्री ओलीले ‘टिम स्पिरिट’ का साथ एनपिएल आयोजनाको तयारी अगाडि बढाउने काममा ध्यान दिन निर्देशन दिए।
यद्यपी युवा तथा खेलकुद मन्त्रालयअन्तर्गतको छानविन कार्यदलले पहिलो संस्करणको एनपिएलको विषयमा अख्तियार दुरुपयोग अनुसन्धान आयोगमा उजुरी परेकाले एनपिएलको काम अघि नबढाउन निर्देशन दिएको थियो।
यो विषयमा प्रधामन्त्री ओलीले छानविन चलिरहदा पनि एनपिएलको काम पनि अघि बढ्नु पर्ने बताएका हुन्।
दोस्रो संस्करणको एनपिएल आयोजनामा देखिएको अन्योललाई चिर्दै प्रधानमन्त्री ओलीले खेल क्षेत्रमा कुनै पनि राजनीतिक नगर्न सबैलाई आग्रह समेत गरे।
ओलीले खेलकुद मन्त्री तेजुलाल चौधरीलाई लक्षित गर्दै राजनीति गर्नका लागि सरकारमा आउनु नहुने बताए।
प्रधानमन्त्री ओलीले भने, ‘सरकारमा पोल्टिकल पार्टी नै आउने हो। पोल्टिकल पार्टीहरु सरकारमा आएर सरकारमा आएपछि राजनीति गर्ने होइन। सरकारमा आएपछि जुन क्षेत्रमा काम छ त्यो क्षेत्रको काम गर्ने हो। कृषिमा काम गर्नुछ भने राजनीति होइन कृषिको विकास गर्नुपर्छ। उद्योगको भएको उद्योगको, संगीत, सााहित्य भए ती क्षेत्रको विकास गर्नुपर्छ, त्यहाँ राजनीति होइन। खेलको विकास गर्ने हो भने खेलमा लगानी गर्नुपर्छ, खेललाई अघि बढाउनुपर्छ। त्यहाँ पोलिटिक्स गर्ने होइन। राजनीतिका लागि त्यो ठाउँ होइन। जो आउँछ उसले पोलिटिक्स गर्ने होइन, पोलिटिक्सभन्दा बाहिर खेल खेलमा ध्यान दिनुपर्छ।'
राष्ट्रिय खेलकुदको समय अब पनि सार्नु भनेको लज्जाको विषय हुने उनले बताए। अब तोकिएको समय (मंसिर) मा राष्ट्रिय खेलकुदको आयोजना हुने ओलीको भनाइ छ।
-1746009348.jpg)
