भारतीय क्रिकेट टोलीका विकेटकिपर ब्याटर ऋषभ पन्तलाई लिड्समा इंग्ल्यान्डविरूद्ध जारी पहिलो टेस्टको दौरान आइसिसीको आचार संहिताको लेभल १ उल्लंघन गरेकोमा दोषी ठहर गर्दै आधिकारिक चेतावनी दिइएको छ।
टेस्टमा पन्तले उत्कृष्ट ब्याटिङ गरेका थिए। उनले पहिलो इनिङग्समा १३४ रन र दोस्रो इनिङग्समा ११८ रन बनाउँदै एकै टेस्टमा दुई शतक प्रहार गरेका थिए।
पन्तलाई इंग्ल्यान्डको पहिलो इनिङग्सको दौरान मैदानमा देखाएको अभद्र व्यवहारका लागि चेतावनी दिएको आइसिसीको भनाइ छ।
पन्त आइसिसी आचार संहिताको धारा २.८ उल्लंघन गरेकोमा दोषी पाइएको छ। यो धारामा अन्तर्राष्ट्रिय खेलको दौरान अम्पायरको निर्णयमा असहमति जनाउने कुरा उल्लेख छ।
इंग्ल्यान्डको इनिङग्सको ६१ औं ओभरमा ह्यारी ब्रुक र बेन स्टोक्स ब्याटिङ गरिरहेको बेला पन्तले बलको अवस्थाबारे अम्पायरसँग छलफल गरेका थिए।
अम्पायरहरूले बल जाँच गरेपछि बल बदल्न अस्वीकार गरेपछि पन्त रिसाएका थिए। उनले अम्पायरको अगाडि भुइँमा बल फालेर रिस पोखेका थिए।
यो गल्ती पन्तले स्वीकार गर्दै प्रस्तावित सजाय मानेका कारण कुनै अनुशासनात्मक सुनुवाइको आवश्यकता नपरेको आइसिसीको भनाइ छ।
पन्तमाथि आरोप अन-फिल्ड अम्पायरहरू क्रिस गफाने र पल राइफल, थर्ड अम्पायर शरफुद्दौला इब्ने शाहिद र फोर्थ अफिसियल माइक बर्न्सले लगाएका थिए।
लेभल १ को उल्लंघनमा न्यूनतम सजाय आधिकारिक चेतावनी तथा अधिकतम सजाय खेलाडीको म्याच शुल्कको ५० प्रतिशत जरिवाना, र एक वा दुई डिमेरिट अंक हुन्छ।
अब पन्तको अनुशासनात्मक रेकर्डमा एक डिमेरिट अंक पनि थपिएको छ। पछिल्लो २४ महिनामा यो उनको पहिलो गल्ती हो।
लिड्समा जारी पहिलो टेस्टको चौथो दिनको खेल सकिदा रोमाञ्चक अवस्था छ। घरेलु टोली इंग्ल्यन्डलाई पाँचौं दिन खेल जित्न ३५० रन आवश्यक छ भने दश विकेट नै बाँकी छ।
