ओपनर जर्ज मुन्सीको उत्कृष्ट ब्याटिङमा स्कटल्यान्डले नेपाललाई १९४ रनको लक्ष्य दिएको छ।
घरेलु टोली स्कटल्यान्डले ग्लास्गोमा टस जितेर पहिले ब्याटिङ गर्दै ५ विकेटको क्षतिमा १९३ रन जोड्यो।
स्कटल्यान्डका लागि ओपनर जर्ज मुन्सीले ७८ रन बनाए। उनले ३९ बलमा ५ चौका र ६ छक्का प्रहार गरे। यस्तै ब्रान्डन म्याकमलेनले ३० बलमा ४ चौका र १ छक्काको मद्दतमा ४२ रन बनाए।
यस्तै माइकल लिक्सले १७ बलमा नटआउट २६ रन र म्याथ्यु क्रसले १३ बलमा नटआउट १७ रन बनाए।
बलिङमा नेपालका कुशल भुर्तेलले २ विकेट लिए भने रुपेश सिंह, ललित राजवंशी र सन्दीप लामिछानेले १-१ विकेट लिए ।
सिरिजमा दुवै टोलीले तीन तीन खेल खेलिसकेका छन्। नेपालले तीन खेलमा दुई जित निकाल्दा स्कटल्यान्ड भने एक खेलमा मात्र विजयी भएको थियो। आजको खेलमा विजयी भए नेपालले सिरिज जित्नेछ।
