विश्व टेस्ट च्याम्पियनसिपको उपाधि भिडन्तमा आजदेखि लन्डनको लर्ड्समा अस्ट्रेलिया र दक्षिण अफ्रिकाबीच सुरू भएको छ।
खेलमा दक्षिण अफ्रिकाले टस जितेको छ। टस जितेपछि दक्षिण अफ्रिका कप्तान टेम्बा बाभुमाले बलिङ रोजेका छन्।
अस्ट्रेलियाको प्रतियोगिताको साविक विजेता हो। दक्षिण अफ्रिका पहिलोपटक फाइनलमा पुगेको हो भने पहिलो आइसिसी मुख्य प्रतियोगिताको उपाधि जित्ने लक्ष्यमा छ।
दक्षिण अफ्रिकाका कप्तान बाभुमा ले टस जितेपछि प्रतिक्रिया दिंदै भने, ‘लर्ड्स को मौसम र पिचलाई मध्यनजर गर्दै हामीले पहिलो बलिङ गर्ने निर्णय लिएका छौं। हामी शुरुवातमै दबाब सिर्जना गर्न चाहन्छौं।’
अस्ट्रेलियाले नयाँ ओपनिङ संयोजनसहित मैदान उत्रिएको छ। नियमित नम्बर ३ ब्याट्सम्यान मार्नस लाबुशानलाई ओपनरका रूपमा पठाइएको छ, जहाँ उनले उस्मान ख्वाजासँग ओपनिङ गरेका छन्।
कप्तान प्याट कमिन्सको नेतृत्वमा अस्ट्रेलियाले क्यामरुन ग्रिनलाई पनि नम्बर ३ मा ब्याटिङका लागि पठाउने विश्वास गरिएको छ।
दक्षिण अफ्रिकाले भने बलिङ आक्रमणमा गति र अनुभवको मिश्रण ल्याएको छ। कागिसो रबाडा, लुंगी एन्गिडी, मार्को जान्सेन र स्पिनर केशव महाराज मुख्य हतियारका रूपमा मैदानमा छन्। पछिल्लो समय प्रतिबन्ध खेपेका रबाडाका लागि यो फाइनल पुनरागमन गर्ने अवसर छ।
पिचले सुरुवाती स्विङ र तीव्र गतिका बलरलाई फाइदा पुग्ने विश्लेषण गरिएको छ। मौसम आंशिक बादलयुक्त रहँदा बलिङ गर्ने टिमको दबाब झन् प्रभावकारी हुनसक्ने अपेक्षा गरिएको छ।
यस खेलमा अस्ट्रेलिया दोस्रो पटक उपाधि जित्ने प्रयासमा छ भने दक्षिण अफ्रिका पहिलो पटक आइसिसी विश्व च्याम्पियन बन्ने लक्ष्यमा छ। खेल १५ जुनसम्म चल्नेछ भने मौसमको असर परेमा १६ तारिखलाई रिजर्भ डे राखिएको छ।
